5,49 €
Mehr erfahren.
- Herausgeber: Books on Demand
- Sprache: Deutsch
Bericht über die Kindheit und Jugend des Autors in einem kleinen Hessischen Dorf Mitte des 20. Jahrhunderts im lokalen Dialekt
Das E-Book Bermicher Gedichde wird angeboten von Books on Demand und wurde mit folgenden Begriffen kategorisiert:
Kindheitserinnerungen, Mundartgedichte, Landleben, Fünfziger Jahre, Dorfgeschichten
Das E-Book können Sie in Legimi-Apps oder einer beliebigen App lesen, die das folgende Format unterstützen:
Seitenzahl: 48
Veröffentlichungsjahr: 2023
Ähnliche
De Günder, Speznome Kevin (Juhrgoang 1951), hod a beweecht Läwe hinner sich. Er hod Elektrotechnik, Pädagogik un in Irland Archäologie schdudiert, woar ASTA-Vorsitzender, Chemielaborant, Pharmavertreter un Bierbrauer. Med sorre irische Fraa is er nooch Kanada ausgewaonnert un mechd sich dord zur Uffgawe, es Bermicher Pladd vierm Unnergoang se redde.
INHALT
Dichder un Denker
Vielleicht klabbts joa
De Rendner
Uffmerksoamkeitsdefizidsyndrom
Ode zum Hoasepladd
Wie’s fräier woar
Suu woarn die Bermicher domols
Foine Leud
Die Gesoangvooine
Es Fesd
Sigga
Die Kloaboh
Wos ned alles bassierd is
Es Ohwedder
Beinoh en Bierjerkriech
Schee woar des Läwe uffm Loand
Es Bagges
Die Omma baggd Bruud
De Mehdrescher
Mer schloachde
Em Obba soa Kou
Ebbelwoi
Heilebiern plegge
Als Kenn hadde mers goud
Unsern Schbielpladz
De Kinnergoarde
Die Ladoinschul
Unser Schuljuhr
Woihnoachdsplädzerche
Die Messdiener
Ned se glaawe, wie fromm mer woarn
Es Aschekreuz
Fasdezeid
Die Klabberbouwe
Die erschd Beichde
De Weiße Sunndoach
Freigerichder Wallwoche
Die Bermicher Grodde
Freidoach
De Deuwel un die kadholisch Modder
En Bermicher en Kanada
De Fall
De erschde Schnie
Es giehd emol widder hoam
Dichder un Denker
Vielleichd klabbds joa
Moan Brouwre is en Dichder,
A wer hods doann geglaabd?
Soll ichs aach emol probiern
Med dere Dichderei?
Vielleichd klabbds joa
Un ihr lacht aach
Iwwer des Bermicher Pladd
Un moa dumm Schreiwerei.
De Rendner
Woammer Rendner is, do hod mer Zeid
Un werd efder zum Dichde volleid
Aach zum Posaune Blose un Singe
Un die Hunde uff en Spaziergoang nausbringe
A wos werd do gegauzd un gesprunge
Un aus lauder Wollusd aach e Liedje gesunge
Uffmerksoamkeitsdefizidsyndrom
Woammer suu dosedzd un denkd
Un sich de Hernkasde vorrenkd,
Do ho ich doch ohgenumme,
Dass profunde Gedoanke rauskumme.
Soi ewwer schun widder oabgelenkd.
Ode zum Hoasepladd
Es Bermicher Pladd is e Gedichd
Die Zierde vom Freigerichd
Doch leider ho die Junge
Koa Oachdung fier die Bermicher Zunge
Wolle ihrne Kenn Hochdeutsch beibringe
Des se selwer goar ned richdich kinne
Oach Kerle, wos e Nod
Woann suu wos Schenem es Ausschderbe drohd
Des Hoasepladd muss mer erhale
Fier die Junge suu wie fier die Aale.
Wie’s fräier woar
Suu woarn die Bermicher domols
Fräier hod mer onnerschd gebaud wie heud.
Mer hod koan Zendimeder vom Grundschdeck vogeud.
Do hod mer Pladz gebrauchd fier die Scheuern un de Schdall
Med em Poulloch, un en Mesthouwe gobs aach iwwerall.
Do wu Leud heudsodoach ihrn Rase genieße
Do woar en Hof, es Groas gehierd uff die Wiese.
En Goarde kunnsde bam Haus aach ned sieh,
Do mussde schun unner die Wingerd gieh.
Koaner hod en ere Fobrik geschaffd,
Alle Bermicher hadde e kloa Loandwerdschafd.
Däi hadde Hinkgel un Säu,
Villeichd aach e Gäsje un naddierlich Keu.
Uff de Wiese ho se Hei gemoachd.
Des ho se med de Keu doann hoamgebroachd.
Em Schbedsummer woars fier die Krumet Zeid,
Do hod jeder geholwe, do gobs koan Schdreid.
Em Herbsd werds Korn gemehd un gedreschd
Nooch em loange Doach werd de Dorschd med Ebbelwoi geleschd.
Die Ernde, Hei un Schdruh weern en de Scheuern voschdaud,
Weern voawweid iwwers Juhr, suu wie mer se brauchd.
Es Schdruh kimmd enen Schdall, do roue die Keu sich druf aus
Nooch e poar Doach kimmds als Mesd uff en Mesdhouwe naus.
Woann die Keu un Säu brunse, des voschdieder doch,
All de flüssiche Oabfall loand doann em Poulloch.
Bis Wender soi die Seu doann schee fedd gemoachd,
Ho genunk gegrunzd, jedzd weern se geschloachd.
Do mache se Worschd, Schinkge un alles meechliche draus
Un ohm Owend droache die Kenn doann die Worschdsobbe aus.
Ohm Soamsdoach do werd die Schdroße gekierd,
Dass se ohm Sunndoach sauwer is, suu wie sichs gehierd.
En de foinsde Klaader werd en die Kerje gelaawe,
Zum Huchoamd, moanchmol aach med ere Daawe.
Nooch em Hochoamd giehd die Fraa hoam, mechd es Middoachesse
De Moann giehd en die Werdschafd, derf sich ewwer ned vogesse.
Woanns suu schee is en de Werdschafd, dass de Moann ned hoam will,
Kimmd die Fraa, treibd en raus med em Mestgoawwelschdiel.
Em Fräijuhr weern doann die Ägger bereid,
De Mesd un de Poul uff de Felder vobreid.
Doann werd alles gezaggerd un schee geechd,
Zum Sehe vierbereid, es Feld werd gefleechd.
Woann de Agger doann ferdich is, do werd gesehd.
Kadowwel weern geschdeggd, un Ohkraud gejehd.
Woanns Groas doann schee loang is, kimmds Hai mache droh
Un de Zergus fengd widder von vorne oh.
Foine Leud
All mir Bermicher woarn nur oafache Leud,
Suu woarn mer, vielleichd hod sichs geennerd heud.
Ewwer en jed Derfje, suu dass es funktsjonierd,
Hoh aach foine Leud higehierd.
En Farrer un en Liere, ohne däi isses ned goange,
un ohne en Dokder oder e Schwesder kunnsde joa nix ohfoange.
Doch suu moancher Moann hod sich emoanzipierd,
Er is meddere foine Fraa aus de Schdodd ohn Aldoar maschierd.
Als Bägger oder Medzjer kunnsde nur oafach soi,
Woann de uffm Loandroadsoamd geschaffd hosd, doann woarsde foi.
De Reudersch Edmund hod en Haller Zichel gebrennd
Soan Schef woar foi, ewwer er hod sich als oafach bekennd.
Moan Ungkel Willi woar bei de Bundesboahn,
Is mem Adam, soam Freund aus Neusich erschder Klasse gefohrn.
Se woarn em Speisewoache, der is nur fier foine Leud,
Do hoh sich de Adam un de Willi ewwer oarch gefreud.
Hoh voll Inderesse die Schbeisekoarde geläse,
Woarn oafach, hoh ewwer wie foine Leud gesse.
Zum Noochdesch hod sich de Willi uff e Oroasche gefreud,
Scheeld se med Messer un Goawwel suu wie foine Leud.
Des foine Scheele is em leider ned gelunge.
