Nöd us Zucker E-Book

Lidija Burčak

• Herausgeber: Der gesunde Menschenversand
• Sprache: Deutsch

Veröffentlichungsjahr: 2022

Beschreibung

Ein bisschen Jammern, ein bisschen Jugo und viel Ja zum Leben. Seit 1990 schreibt Lidija Burčak Tagebuch. Diese waren nicht für die Öffentlichkeit gedacht, doch Lidija Burčak fasste sich ein Herz! Und begann, zuerst im Freundeskreis, dann im grösseren Rahmen, aus ihren Tagebüchern vorzulesen. Im Band "Nöd us Zucker" veröffentlicht sie nun Auszüge aus 17 Jahren Tagebuch, die sie im Alter von 15 bis 33 geschrieben hat, und zwar ohne auch nur einen Satz daran zu ändern. Wir erfahren direkt und unmittelbar von den Sorgen und Wünschen einer heranwachsenden Seconda: Wie mit sich klar kommen, welchen Weg gehen und wen lieben? Sie kämpft mit Druck von aussen und Verwirrung von innen; ist wütend über die Lage der Welt, die Enge der Schweiz und die Langeweile in Winterthur. Ein Hin und Her zwischen schonungsloser Selbstkritik, nervigen Sinnfragen, grenzenlosem Optimismus und der Sehnsucht nach einem Leben als Künstlerin.

Leseprobe

Lidija Burcak

Nöd us Zucker

edition spoken script 45

1. Auflage, 2022

© Der gesunde Menschenversand, Luzern

Alle Rechte vorbehalten

eISBN: 978-3-03853-183-8

Lektorat: Tamaris Mayer

Herausgeber:innen: Matthias Burki, Ursina Greuel, Tamaris Mayer, Daniel Rothenbühler

Gestaltung: hofmann.to

Der gesunde Menschenversand wird vom Bundesamt für Kultur für die Jahre 2021 – 2024 unterstützt.

www.menschenversand.ch

Ähnlichkeiten mit lebenden Personen sind nicht zufällig, sondern tatsächlich vorhanden. Die Texte stammen aus meinen Tagebüchern und wurden in einem Guss der Emotion geschrieben. Schreibfehler wurden korrigiert und Namen geändert.

Ich bedanke mich bei allen, die mich auf dem Weg zu diesem Buch begleitet und mir immer wieder Mut zugesprochen haben.

Inhaltsverzeichnis

Impressum

Sunntig, 7. Februar 1999 / 18:05

Sunntig, 18. Juli 1999 / 24:16

Samschtig, 1. Januar 2000 / 01:47

Sunntig, 13. August 2000 / 00:35

Sunntig, 27. August 2000 / 00:22

Samschtig, 23. September 2000 / 00:15

Dunnschtig, 11. Januar 2001 / 00:15

Mittwuch, 24. Januar 2001 / 22:08

Oschtermäntig, 16. April 2001 / 00:31

Dunnschtig, 16. August 2001 / 23:32

Dunnschtig, 13. Dezember 2001 / 23:55

Mäntig, 4. März 2002 / 01:50

Sunntig, 22. September 2002 / 23:40

Mäntig, 29. März 2003 / 15:45

Sunntig, 13. März 2004 / 10:15

Dunnschtig, 14. April 2005 / 00:10

Zischtig, 20. September 2005 / 23:50

Zischtig, 18. Oktober 2005 / 23:50

Samschtig, 5. November 2005 / 14:00

Samschtig, 4. Februar 2006 / 16:25

Mittwuch, 8. Februar 2006 / 23:15

Mittwuch, 19. Juli 2006 / 19:00

Mittwuch, 25. Oktober 2006 / 23:09

Zischtig, 21. November 2006 / 23:10

Samschtig, 25. November 2006 / 01:30

Zischtig, 28. November 2006 / 23:40

Mittwuch, 29. November 2006 / 23:20

Mittwuch, 28. Dezember 2006 / 00:40

Mäntig, 14. Januar 2007 / 00:30

Sunntig, 18. Februar 2007 / 23:05

Dunnschtig, 19. April 2007 / 23:30

Fritig, 4. Mai 2007 / 01:30

Mäntig, 21. Mai 2007 / 23:30

Zischtig, 23. Oktober 2007 / 22:50

Mäntig, 7. Januar 2008 / 23:20

Sunntig, 10. Februar 2008 / 22:00

Sunntig, 25. Mai 2008 / 23:05

Zischtig, 30. September 2008 / 22:40

Sunntig, Scheissdatum, Scheissjahr, scheisse / 22:30

Zischtig, 18. November 2008 / Bin 25i!

Fritig, 17. April 2009 / 23:30

Mittwuch, 29. April 2009 / 23:20

Samschtig, 27. Juni 2009 / 23:55

Fritig, 10. Juli 2009 / 21:55

Zischtig, 8. September 2009 / 10:30

Mittwuch, 28. Oktober 2009 / 00:00

Nedelja, 22 novembar 2009 / 23:50

Zischtig, 1. Dezember 2009 / 22:30

Samschtig, 22. Mai 2010 / 23:55

Sunntig, 30. Mai 2010 / 22:45

Zischtig, 8. Juni 2010 / 23:50

Mittwuch, 16. Juni 2010 / 23:30

Sunntig, 19. Dezember 2010 / 23:00

Mäntig, 10. Januar 2011 / 22:30

Zischtig, 15. März 2011

Fritig, 6. Mai 2011 / 01:40, Berlin

Mittwuch, 19. Dezember 2011 / 9:00, Berlin

Sunntig, 13. Mai 2012 / 23:15

Dunnschtig, 21. Juni 2012 / 00:10

Mittwuch, 18. Juli 2012 / 11:00

Fritig, 19. Oktober 2012 / 16:55

Fritig, 2. Dezember 2012 / 01:40

Sonntag, 4. August 2013 / 18:40

Samschtig, 3. November 2013 / 23:45

Sunntig, 22. Juni 2014 / bald Mitternacht

Mittwuch, 2. Juli 2014 / 23:55

Fritig, 24. Oktober 2014 / 23:55

Samschtig, 13. Dezember 2014 / 07:15

Mäntig 13. April 2015 / 23:53

Mäntig, 4. Mai 2015 / 23:40

Fritig, 14. August 2015 / 19:03

Samschtig, 15. August 2015 / 17:58

2015

Mäntig, 29. August 2016 / 08:30

Sunntig, 30. Oktober 2016 / 22:40, London

Über die Autorin

Nachwort: Team Lidija

Sunntig, 7. Februar 1999 / 18:05

Ich hocke uf mim Bett, lose Oasis und bin chli truurig. Mini Eltere sind Arschlöcher. Am letschte Fritig hani wieder emal ghüüled und sie hend mit mir gredt. Natürlich nöd richtig. Sie hend mich zämägschisse vo wägä ich müessi mit ihne über mini Problem rede. Was für verdammti Penner. Mir stiiged Träne id Auge, weni a die Situation dänke. Sie chönd doch nöd vo mir verlange, dass ich mit ihne rede söll, wenn sie dänn alles wiiter verzehled, so dass es dänn grad alli wüssed. Das chani gar nöd bruche.

Usserdem säged mini Eltere au, dass ich kei Gründ zum hüülä oder zum unglücklich si han. Vo wo wends das wüsse? Sie hend s Gfühl, ihri Problem seged tuusig Mal krasser. Naja, vilicht stimmt das ja au, aber trotzdem därfed sie mich nöd so behandle, wie wänn ich es chliises, unerfahrnigs, blöds, naivs 15-jährigs Meitli bin, wo kei Ahnig het vo de Welt und vo wahre Problem.

Jedefalls han ich am letschte Fritig e Lischte gmacht, vo Sache, wo ich vo ihne wett: Jede zweiti Fritig oder Samschtig in Usgang bis am 23:00. Bi de Manu oder Moni dörfä penne. Ein Tag snöbe mit mine Kollege, dass ich is Kino därf vo 20-22 Uhr, halt alles eso Usgangssache. Wo ich ihne d Lischte zeigt han, händ sie mich usglached, will das sonen Art Vertrag isch. Aber sie hend igwilligt, bis uf paar Pünkt. Aber nöd emal sonen Vertrag bringt Rueh zwüsched mine Eltere und mir. Ich han jetzt gmerkt, dass es ebe nöd die Usgangssache sind, wo mich so unglücklich mached.

Klar, es nervt mi scho, weni nöd use derf. Aber es git ebe no anderi Sache, wo mich so unglücklich mached. Leider weiss ich nöd, no nöd, was das für Sache sind.

Mini Eltere und ich sind hüt im Mövepick ade Autobahn gsi. Sie hend jetzt en Fiat Lancia. Det hämmer öppis trunke. Dänn han ich gfreged, ob ich mitderf, wenn mini Kollege go snöbe gönd. Sie händ gseit «Nei» und ich ha gfräged «Warum». Und scho isch d Diskussion losgange: Wie toll und brav ihri Generation gsi isch. Dass ich nicht lache! Usserdem würdi Schundblätter läse, wie s Bravo, s Girl und s Mädchen. Ich weiss nöd, öb sie d Büecher vo de Katherine Applegate au gmeint händ? Ich würdi kei gschiidi Büecher läse, aber das stimmt gar nöd. Ich liese zum Bispiel au s P.M. Das isch es wüsseschaftlichs Heft, sehr interessant. Mich interessiered mega viel Sache und im Vergliich zu mine andere Schuelkollege bin ich sehr bildet mit mine 15 Jahr.

Mini Eltere kenned mich gar nöd. Sie denked, ich bin eis vo dene blöde Tussis, wo sich nur für Geld, Chleider und Jungs interessiert und kei Wert uf Bildig leit. Sie denked, ich trinke bi jedere Glegeheit Alkohol, nimme Droge oder gah mit jedem Bueb is Bett.

Mini Eltere seged au, ich söll mir Hobbies sueche. Aber weni öppis vorschlahn, denn isch es nöd guet oder z tüür. Sie seged zum Bispiel, ich söll Basketball spiele. Aber das wett ich gar nöd. Ich liebe Theater, Film, Tanz, Schauspiel, Fotografiere und Singä. Halt alles Sache, wo e Künstlerin macht! Aber ich glaube, das passt ihne nöd, will ich denn kei Bildig hetti. Aber ich weiss ganz genau, dass ich eines Tages uf de Bühni stah oder vor de Kamera spiele wird, vilicht sogar singe! Ja, das isch min Traum! Aber weni ihne das verzehle wür, würed sie mich überhaupt nöd unterstütze, will das alles kei Sicherheit git.

Das, was mich no am Läbe bhalted, isch d Hoffnig uf mini späteri Freiheit und de Glaube a mich, dass ich’s schaffe wird. Ich freu mich sehr uf mis Läbe nach de Gfangeschaft. Während de Gfangeschaft mach ich alles, zum mich guet uf mis spätere Läbe vorzbereite.

Ich merke grad, dass Mänsche, wo viel Tagebuech schriebed, kei echti, engi Fründe händ, suscht würed sie das dene verzehle. Tja, ich bin halt en recht einsame Mensch. Aber a das hani mi scho gwöhnt. Ich halte sehr viel uus.

Sunntig, 18. Juli 1999 / 24:16

Ja ja, es isch viel passiert … also ich fang mal a. Am Dunnschtig hämmer d Abschlussfiir gha vo de Sek mit de Eltere bis am 21:00. Gäg die halb 10i simmer dänn zum Walchäweiher. Das isch Tradition bi eusere Schuel. Oh man, ich liebe d Nacht vom Dunnschtig uf de Fritig!

Also: Ich chume so ufe und alli Kollege sind scho det. Ich han nur eis Hooch trunke, 4% Alkohol. Ich bin nöd bsoffe gsi. De Andi hät 10 Bier gha und isch recht druff gsi. De Gianni isch au det gsi. Zerscht bini viel mit em Gianni zämä gsi. Er hät voll so gredt, als wär er anderscht als alli andere. Ok, ich gibs zue: Ich han au es Aug uf de Andi gworfe. Später hani mitem Perez no Tequila, Vodka-Cola und Malibu trunke. E halb Stund später bini recht schwach und zue gsi. Ich bin immer meh mitem Gianni zämä gsi. Ich bin mit ihm denn det ane, det wo eus nöd so viel hend chöne gseh und er het mir gseit, ich sölli ihm en Kuss gäh. Ich han ihn küsst: ZUNGEKUSS! Es isch es geils Gfühl gsi, ich han fascht nüme chöne stah. De Perez isch denn immer wieder zu mir cho und hät mich vor ihm gwarnt. De Rescht vom Abig hani denn mit em Andi verbracht. Mir sind die ganzi Nacht wie es Päärli zämä ghängt. Sini Backe isch immer a minere gsi und wänn er öppis gseit hät, isch es voll geils, schöns Gfühl durch min Körper gschosse, vom rechte Ohr abe bis zum linke Bei.

Ich han ihn mal am Hals küsst und er hät so uhuere fein gschmöckt und ich glaub, er hät mich uf mini Stirn küsst und ich han ihn immer wieder mit minere chalte Nase berüehrt und ich glaube, er hät mini Nase is Muul gno und hät sie aghuuched. Mir sind ufem Bänkli ghocked, ich bsoffe, er nüm. Er hät min Chaugummi welle und ich han ihn ihm dänn us mim Muul geh und mir händ gseit: «En indirekte Zungekuss!» Und ich han ihm au gseit, er gseht geil us, wenn er E-Gitarre spielt, im Azug, woner vo sim Vater übercho hät, und er: «Danke!» Und ich han ihm au gseit, dass ich in ihn verknallt gsi bin: «Du au?» – Er: «Ja.

Scho no schräg, mir sind beidi inenand verknallt gsi und sind nöd zämä gange?» Ich bin dänn immer wieder zu ihm ane und han ihm gseit, dass es mich aschisst, dass jetzt alli über eus redet. Er hät nöd gseit, dasi Recht han, sondern dass es scheissegal segi. Er isch ufem Bänkli ghocked und ich uf ihm, min Rugge uf sinere Bruscht, Backe a Backe und ich glaub, mir händ d Sterne aglueged. Ich han ihm gseit, dass wänn er redt, er eim nie id Auge luegt, und er denn eifach weglauft. «Was dir alles uffallt.» De Remo isch die ganz Ziit näbed eus ghocked. Er het gseit, dass ich mitem Andi rede, aber immer ide 3. Person Einzahl vo ihm rede. Ich han viel sis Gsicht mit eim Finger aglangt. Mir händ Händli ghebed, wie es Päärli. Oh man, isch er geil und nett und süess!

Am Fritig Morge ide Schuel händ alli gfreged: «Hey Lidi, was häsch mit em Andi gmacht?» Mir händ voll grölt. Am 16:00 simmer dänn alli bim Velo-Platz gsi und händ Tschüss gseit, s Endi vode Sek. Ich han am Andi nur welle d Hand geh, aber er hät mich so anezoge und hät mir 3 Küssli gäh.

Ich glaub, ich bin vilicht in Andi verknallt, aber ich weiss nöd, öb er i mich. Die Sach isch komisch … Summerferie! Er isch 10 Tag im Pfadilager, dänn gaht er is Südtirol, die 3. Wuche isch er dihei, aber ich bin die 3. und 4. Wuche weg, Schicksal? Nimmt mi mega Wunder, ob er mir e Charte schriebt.

Samschtig, 1. Januar 2000 / 01:47

Also mal zämägfasst, was so passiert isch, in Lidijas aufregendem Leben.

1. Ich han es Natel.

2. Ich han nöd dörfe ane Silvesterparty.

3. Ich han Existenzangscht.

So, jetzt d Details: Ich han es Natel kauft für 120.-. Die erschti Rechnig: 71.- für 10 Täg, keis Problem. D Manu und d Moni sind uf Zürich ane Silvesterparty is Palais. Ich han nöd mal da in Winti is Salzhuus dörfe. Weni het dörfe, wär ich heimlich nach Züri gange. Das ganze Millenium-Getue hät mich sowieso gnervt. So und jetzt zum richtige Problem:

Irgendwie han ich Existenzängscht. Ich mach ja jetzt die KV-Usbildig, aber ich weiss, dass das nöd mis métier isch.

Jetzt: Min Verstand seit mir, mach die Usbildig, gueti Grundlaag, nachher häsch Geld. Mis Herz kackts aber a. Jetzt grad bim Schriebe wird mir klar, dass ich tatsächlich die Usbildig mache. Ok. Ich mache dänn no s DELF. Das isch es international anerkannts Französisch-Diplom, wo nöd ganz eifach isch. Ich versuechs. Ich wett unbedingt Tänzerin und Schauspielerin wärde! Wow, das tönt nacheme typische Meitli-Traum. Aber ich dänke, ich bin gnueg alt, zum nüme unrealistisch sii. Ah ja: Ich finde, ich bin e sehr vernünftigi Person, wo Entscheidige mitem Verstand trifft, nöd mit em Herze. Es isch jetzt 2 Uhr und ich schlafe nonig. Also: Ich han d’LAP und, so hoff ich, s DELF und Geld, öppe 15’000.-, das han ich scho usgrechnet. Mir isch jetzt e Tanzusbildig wichtig, ABER: Ich wett nöd blöd sii und drum wett ich ad HMS. Isch zwar nöd ganz Uni, aber isch au guet und ich chan prüefigsfrei ine, weg de BMS. Also: Ich bin denn 18i, zieh vo dihei us (chan mich da nöd usläbe), bin jung und han Geld! Ad HMS chani ja au, wenn ich 22 bin? Zerscht e Tanz- und Schauspielusbildig, vilicht in Paris? Französisch chani denn ja, wegem DELF, oder nach London? Das chani nur usefinde, weni vorher det id Ferie gahn. Dänn hani also d Usbildig, wo wahrschinlich 3 Jahr gaht, chume zrugg id Schwiiz mit 22 und chan ja dänn no ad HMS bis 25. Ja und dänn? Isch mir jetzt gliich. Ich muess ja nöd übertriebe mitem Planiere. Chönt ich au im Usland ane Art HMS? Will denn chönti ja grad beides glichzitig mache? Denn muesi aber no Geld verdiene zum überläbä. Bis es so wiit isch: Tanze ich, soviel ich chan. Mängisch, weni allei dihei bin, spiel ich eifach irgendwelchi Szene. Das mach ich gern, zum üebe.

Falls ich das liese und ich bin 22i oder elter und ich nöd öppis vo dem mache, dänn hoff ich, dass ich mini Meinig gründlich gändered han und ich mir absolut sicher bin, dass das richtig isch, wo ich jetzt mache oder ich sett min Wäg dringend ändere, will: Mer isch nie für öppis z’alt! Bsunders nöd mit 22i. So, ich schlafe jetzt. Es isch eigentlich de 2. Januar 2000, halbi 3. Guet Nacht.

PS: Ich wett en Fründ!!

Sunntig, 13. August 2000 / 00:35

Ich chönti ohni Problem ide Psychiatrie lande. Isch das nöd truurig? Was bin ich nur so kaputt? Ich därf nöd so viel fräge. Ich sueche Logik, obwohl ich nöd logisch begabt bin? Fuck! Isch das logisch??? Logisch heisst doch Gründ haa. Wer brucht die scho? Nei, Logik isch schwerer. En Grund isch au: «Eifach so» oder «Will ich eso fühle» – Logik isch nöd so … Logik brucht konkreti Antworte. Aber wer stellt d Frage? Was sind überhaupt Frage? Sind Frage nöd komisch? Oh mein Gott, ich glaube, ich dreh dure. Schnell schlafe, morn bin ich wieder normal. Fräg nöd!

Sunntig, 27. August 2000 / 00:22

Ich lose grad s Gospel-Lied vo Fame, chan nöd schlafe, han grad so verdammt viel Energie in mir! WOW! So viel!!! Aber ich sötti jetzt schlafe. S Schriebe beruhigt mich chli. Ich mach mir viel z viel Gedanke über d Zuekunft und das isch jetzt nöd d Pubertät, ich bin so! Ich han so viel Gedanke im Chopf. Öppis weiss ich: Ich bin en Mänsch. Ich bin sit 16 Jahr und 9 1/2 Mönät uf dere Wält und ich han usegfunde: Ich muess immer öppis ztue ha.

Das tuet mir guet. Will wänn ich nüt ztue han, dänn dänk ich nah … z viel … das isch nöd guet. Ich stell z viel Frage, wo nöd z beantworte sind. Ich überlege z viel über d Problem vo anderne, anderne in anderne Länder, das isch chrank, das füehrt zu nüt. Ich gseh s Negative z fescht.

Ich glaube, ich bin en positive Mänsch, wo viel Energie hät. Wänn ich das aber nöd umsetze chan, dänn verfall ich mine negative Gedanke, wo jede Rückschlag vo mir nutzed. Ich bin so komisch. Ich bin extroventiert, oder -vertiert? Aber dänn wieder plötzlich introventiert, oder -vertiert, was mir, glaub ich, nöd guet tuet. Es isch so schwierig usezfinde, wie mer isch und was guet für mich isch.

Ich bin hüt ide Spaghetti Factory gsi. Hoffentlich derf ich det schaffe, hoffentlich!!! Muess ufs WC, Moment …

So, bin wieder da. Am liebschte würd ich, wänn ich allei wohne wür, irgend öpperem es SMS schriebe und irgendwo imene Restaurant abmache (ich han Hunger) und über mini Gedanke diskutiere. Das heisst, ich muess weg, nach London, New York, Paris. Züri langed für de Afang. Ich bruch viel Lüüt um mich. Ich muess chöne usegah, wänn ich wett, und nöd vo dänn bis dänn, wills denn zuemacht.