Gedanke us em Nüüt E-Book

Stefan Dietrich

• Herausgeber: BoD - Books on Demand
• Kategorie: Poesie und Drama
• Sprache: Deutsch

Seitenzahl: 49

Veröffentlichungsjahr: 2025

Beschreibung

Stefan Dietrich legt mit seiner zweiten Mundart-Veröffentlichung Gedichte und Texte vor, die zwischen Humor, tiefgründiger Nachdenklichkeit, leichtfüssiger Poesie, überraschenden Versen oder Liedern gekonnt hin und her fliessen. Dabei zeigt der Autor Blicke auf das Leben oder in Gedanken- und Traumwelten hinein. Dietrich beschreibt einzelne Personen liebevoll, mit genauer Beobachtungsgabe und Einfühlungsvermögen. Eine Mundart-Gedichtauswahl zum Denken und Träumen. Traumhaft schön.

Leseprobe

Inhaut:

1. Uftakt

im Aafang z Lache

dr Morge

äs sinnloses Gedicht

2. Gedanke us em Nüüt

z Dunkle flackeret häu

Gedankesalat

Gedanke us em Nüüt

z Stoubchorn

uf em Wäg

unnütz

Horizont

3. Lieder

Haifisch-Furcht

i ha gseit

dr Ton

Reise-Lied

4. Liebi

i dänken a di

läbigi Poesie

danke

verplatzti Tröim

du

5. Värsli

Zahle-Värsli

z Huus

d Flöige

Namens-Värsli

dr Maa im Mond

dr Herr Meier

eigesinnigi Värsli

z Wasser

z Lache

6. philosphischi Gedicht

dr Ängu I

dr Ängu II

warum?

dr Herr Donnschtig

z Fänschter

z Warum

d Sunne

d Hoffnig

7. Erzähl-Gedicht

dr Herr Stämpfli

dr Wurm

dr Spiugu

Dialog

dr Florian

z Müüsli

Socke

z Biud

Begägnig im Waud

Grücht

Gspräch

z Gras

8. Schluss

Erinnerig

Schluss

dr Hans

1. Uftakt

im Aafang: z Lache

im Aafang isch z Lache gsi

äs luegt ä chly unglöibig dry

da isch nüüt

ke Pflanze

kes Tier

kes Wassertröpfli

kes Bier

ke Bärg

kes Tau

z Lache dünkt das Nüüt

fatau

z Lache het fescht nachedänkt

warum isch mir de z Läbe gschänkt?

was isch my Sinn, my Zwäck?

äs het ja nid mau Dräck

sueche, das bringts äuä nid

wiu im Nüüt het s ke Musig

kes Wort

ke Zwärg

ke Blueme

ke Bärg

z Lache het afaa probiert

z lache

aber äs isch rein gar nüüt passiert

ig bruche än Aafang und ä Richtig

äs Fundamänt, das schynt mir wichtig

eis isch klar:

zersch uf dr Wäut isch z Lache gsi

nid öppe z Gäud

für über d Wäut chönne z lache

isch eini vo de wichtigschte Sache

we z Lache blybt i dr Zyt

de cha s stürme u chuute

de cha s chlage u wüete

we z Lache blybt

überstan i jedi Zyt

jedi Minute, aui Stunde

wen öpper z Lache wyter schänkt

de heile fasch aui Wunde

im Aafang isch z Lache gsi

äs schynt klar, warum und wie

we z Lache nid immer scho da wär

wär s für üs Mönsche

farblos und schwär

dr Morge

dr Morge

tuet sehr gärn

entsorge

we d Nacht verstummt

het dr Morge im Gfüü

dass z Nöije chunnt

dr Morge tuet gärn

lääri Fläsche entsorge

us syre Täsche ziet är

bruuni, grüeni und ä bsungers schöni

s isch furtgheit:

z Nöije entsteit

dr Morge tuet gärn

auts Papier entsorge

är macht äs subers Bündeli

dräijt no näs Velo-Ründeli

d Manne näh z Papier mit

i d Recycling-Fabrig

s isch furgheit:

z Nöije entsteit

dr Morge tuet gärn

Gedanke entsorge

pynlechi oder schwäri Gedanke

lääri Gedanke

blödi Gedankelücke

närve bym abe bücke

s isch furt gheit

z Nöije entsteit

dr Morge tuet gärn

Wort entsorge

verletzendi, missverstandeni Wort

berächnendi, verhöhnendi Wort

amene schöne Ort

s isch furt gheit:

z Nöije entsteit

dr Morge tuet gärn

d Nacht entsorge

z Glitzere u Funkle

z mitts im Dunkle

dr Morge cha s nid versta:

z Liecht chasch doch häuer

intänsiver am Tag ha

aber glych het är s gärn:

dr Mond und dr Stärn

we d Dunkuheit geit

isch äs dr Morge

wo entsteit

äs sinnloses Gedicht

das Gedicht

isch ke Zyle wärt

jedes Wort

isch verchehrt

z Punkt steit dert

wo z Komma sött sy

z Verb weiss nie genau

öb jitz oder gly

drum fangen i lieber

gar nid afaa schrybe

ig tue lieber dusse

im Garte blybe

dä Satz git

überhoupt ä ke Sinn

wen ig wyter schrybe:

was isch dr Gwinn?

dr Gedanken isch furt

äs schmöckt nach Ässe

was ig ha wöue:

i ha s vergässe

das Wort, wo da steit:

Salatblattseich

i verstaa mi säuber nüme

und i wirde ganz bleich

aber äs rotiert eifach wyter:

Schoggibananeryter

Guudgrützegoaugeniau

Schimmumuus-chäuerregau

Wortfätze

Siubesackgasse

Sinngreber

Gedankegalopp

das cha nid

dr Gral vom Schrybe sy

das geit ja nume

in ä Gedankekreisu dry

dass ig für mi säuber

gloubwürdig by

hören ig uf

und la s la sy

auerdings muess ig

ehrlech blybe und säge

dass ig äs viu-ströphigs

Gedicht ha gschrybe

2. Gedanke us em Nüüt

z Dunkle flackeret häu

d Stärne sy scho gstorbe

u dr Mond grüesst äs letschts Mau

Reise i z Nüüt wärde beworbe

u jede heig doch irgend ä Wau

äs isch geschter gsi oder scho morn

dr Don Camillo lachet mit em Pepone

d Liebi säglet mit em Zorn

uf em Sand ligt ä verfuleti Melone

d Sunne schläcket anere Glace

dr Kapitän Ahab strychlet em Moby Dick

mit emene Häxebäse d Nase

dr Hans im Glück kennt ä Zoubertrick

z Dunkle flackeret häu

dr Zwärg isch dr Gröschti vo de Riese

z Zögere isch unfassbar schnäu

dr Rychtum isch zwöihundert i de Miese

äs isch dr Aabe, wo nid vergeit

vor em Gwitter, wo nie chunnt

äs isch dr Wächter, wo i dr Türe steit

äs isch di erschti Fridensstund

Refrain:

d Wäut schnufet sichtbar düre

z Nöie gewinnt z Spiu

z Vergangene luegt füre

dr gueti Plan isch a sym Ziu

d Stiui lüütet i den Ohre

dr Schryyner bout mit Guud

dr Schatz isch nüme verlore

furt sy d Angscht u d Schuud

z Schiff gleitet über d Wäue

dr Sturmwind winkt zum Gruess

dr Stummi tuet verzeue

d Chole verbrönnt ohni Ruess

z Reh wohnt für immer bym Löi

dr Turm hocket im grüene Gras

z Aute füelt sech ganz nöi

d Antwort fragt: warum und was?

z Nie probiert s no einisch

dr Abgrund bout ä Brügg

dr Bättler hocket am Tisch

d Zuekunft luegt zrügg

wo dr Rägeboge ändet

hesch DU mir Muet gspändet

dini Liebi isch mir bekannt

DU bisch mit den Ängle verwandt

Refrain:

d Wäut schnufet sichtbar düre

z Nöie gewinnt z Spiu

z Vergangene luegt füre

dr gueti Plan isch a sym Ziu

d Einsamkeit bittet zum Fescht

z Misstroue laat d Türen offe

z Leid faat afaa hoffe

z Sicher-isch-Sicher weisss: äs isch ke Tescht