Erhalten Sie Zugang zu diesem und mehr als 300000 Büchern ab EUR 5,99 monatlich.
- Herausgeber: Books on Demand
- Kategorie: Poesie und Drama
- Sprache: Deutsch
Gedichte und Geschichten zum Lachen und Schmunzeln. In Pfälzer Mundart.
Sie lesen das E-Book in den Legimi-Apps auf:
Seitenzahl: 66
Veröffentlichungsjahr: 2013
Das E-Book (TTS) können Sie hören im Abo „Legimi Premium” in Legimi-Apps auf:
Ähnliche
De gold’ne Middelwech
Heiteres und Besinnliches
von
Karl-Heinz Ohlhäuser
1. Auflage mit neuen Texten
(Originalausgabe 2001)
Books on Demand
Inhalt
De gold’ne Middelwech
Lääwe is schee
Gsetze misse sei
Abzoggerei
Bleedsinnich
Fer de Eene de Euro – fer de Anner de Teuro
Liewer Keifer loss der saache – Rabadde werre vorher druffgeschlaache!
Immer uff die armen Raucher
Hausgewidder
Erwet heit?
Der gegloonde Schdammhalder?
Getrennt is mer glei
Rendnerlääwe mit Froochezeiche
Geredd is annerscht wie gedenkt
Wuhie in de Urlaub?
De Kämber
Tourischdegebääd
Moi erschdi Kur
De Schloofkobb
Millennium
Freehliche Oschdere
Wonnemonat
Summer
Die Herbschtbeischde
Der Brezzlmann
De Schdadtbummel
Die Bolitesse
Was misse mer wem schenke?
Uffem Weihnachtsmarkt in Ludwigshafe
En Weihnachtsbrief
Weihnachten friher un heit
Die Kripp unnerm Baam
Unnerschiedliche Glaabe
Die Sunndachsbreddisch
Die Hell vun de Annere
Geschdern, Heit un Morche
Friehling
Familienstreit
Beim Dogder
De Krankeb’such
G’sund bleiwe
Bleiwe losse
Iwwer mich un fer Eich
De gold’ne Middelwech
De Hannes kummt heem un zieht e Schlerr.
„Was ischen los – wu kummschen her?“
„Ich hab mich geärjet iwwer de Filb,
weil der immer mei Reewemesser will!“
„Un, hoschsem gewwe fer umme?“
„Nee, ich hab de gold’ne Middelweech g’numme!“
„Halsch mich fer bleed –
hotters odder hotters net?“
„Hetters – dann wers fort fer alle Daach,
er hotts net un s’war a ken Krach,
mer ware friedlich un hänn net gschdridde,
uffem goldne Wech dorch die Midde.“
„Is dort der Middelwech – wu’d warsch?“
„Nee, ich hab zum Filb gsaad:
Geh her unn legg mich am A…!“
Lääwe is schee
Wammer schun nix mitnemme kenne,
will mer’s Lääwe doch bhalte.
Dodezu e paar Tibbs um’s zu gschdalde:
Kenner muss im Alder uff de Kärschhof renne,
losst eich viel Zeit – duud eich was genne.
Ehr kennt aach schbaare uns Gerschdel ve’erwe,
awwer dodemit dud ehrs mit all de Verwande
ve’derwe.
Ihr griets jo nimmi mit – kennts aach net seh –
wann? – dann deed ehr eich im Grab rumdreh.
Un ward ehr aach nowel wie en Keenich –
glaabt mers – s’war un s’is immer zu weenich.
Un um de Krach unner derre Bagaasch zu meide,
wanners kennt, gebts aus – un des beizeide.
Die hinnedraa werre maule – griehn Gosch net zu –
awwer eens is gwiss – ehr habt eier himmlisch Ruh.
Wie ichs Lääwe geniess, sollner wisse,
habs net schdudiert – habs a erscht erfahre misse.
Mein Wech zur Eisicht un Zufriedeheit,
war arsch holwerich un unendlich weit.
Den bin ich geloffe, gschdolbert, gegroche,
un hab mer manschmool schiers Genigg gebroche.
Jezzat, no iwwer 70 Johr, is de Weech gut eewe
un heit du ich bedachder un freier lääwe.
Du viel klennere Bretscher bagge
un fer annere nimmi de Daggel mache.
Aach’s Fernseh kammer de Daach net weise,
liewer mit de Fraa schbiele, wannere un reise.
Mer braucht Ziele um de Zeit zu gschdalde
un die muscht fescht im Aach behalde.
Jeden Daach dun mer do draa denke
un losse uns vun nerchens un nix ablenke.
Aach net vun Sorje un Zweifel –
fort demit – am Beschde zum Deifel.
Die mache dich krank, verwerre die Sinne
un keen Dogder wird bei dir was finne.
Keener die krank vum Drinke un Esse,
awwer schun manchen hot die Angschd uffgfresse.
Wie werds werre – hab ich mich efder bsunne –
un ledschd, isses immer annerschder kumme.
Do denk ich heit draa un du lache -
Sorje soll sich doch de Nochber mache.
Hot der mool widder Krach im Sagg,
dann wink ich dem glei afangs ab –
denn – die Kretz am Hals – de Blitz soll dich beim…
(mei ganzes beeses Hoffe)
is nochem Schdreit niemools eigetroffe.
Newebei, wann du mool schdreidschd,
du selbschd am meischde drunner leidschd.
Wach ich morjens uff – de Himmel grau,
digge Drobbe am Fenschder runnerfließe,
free ich mich – brauch jo net zu gieße.
Hots achmool aschdennisch gschebbert
un ich hab e Tass zerdebbert,
du ich nimmi im Zorn versinke –
finn mich ab – aus der kannsch halt nimmi drinke.
Mit denne Beischbiel will ichs losse,
des sin fer mich heit alles Bosse.
Loss den flieche de alde Hut,
denn nooch de Ebbe kummt die Flut.
Do werd aach viel uffgewiehlt –
awwer’s Meischde widder fortgeschbielt.
Aach des vun geschdern geht mit unner,
dodebei de Ärjer un de ganze Kummer.
Uns Vergangne – was no an mer henkt,
des werd aach mit fortgeschwemmt.
Erlääwe kann ich nur de jetzich Zeit
un beede: „Unser däglich Brod, des geb uns heit!“
Un jeden Owend sach ich dankbar in meim Nescht:
„Heit is widder de schenschte Daach gewesst!“
Gsetze misse sei
Ob dich langsam bewegschd odder hetscht,
in Deitschland machsch alles noochem Gsetz.
Auskenne un ve’schdeh duud des ken Deifel,
selbscht die Mächer sin im Zweifel,
die hawwes schwer – denne fallt nix meh ei –
egal – Gsetze misse her – Gsetze misse sei.
An die Erdanziehung hot mool eener gedacht
un vor 400 Johr do draus e Gsetz gemacht.
Die Leit sollde wisse, was sie uffem Boddem halt
un aach, warum alles nunner fallt.
So Gsetze, die vergreßere dei Wisse –
brauchsch ken Aawalt un wersch a net bsch….
neigelecht.
De unnerschied zwische Netz un Gsetz?
„Im Netz bleiwe die Große hänge
un die Kläne falle durch!“
Abzoggerei
Willsch was kaafe uff dere Welt,
brauchsch vor alle Dinge Geld.
Musch bezaale – do helfe kee Drix,
denn fer nix, do gibt’s heit nix.
Was es koscht is gschriwwe – wann net, duud mer
de Preis deer saache.
Ich kann’s lese – ich heers aa – awwer ehr Leit:
„Ich kann’s als net glaawe!“
Bleedsinnich
Weil unser Kieh vum Wahn besesse,
sollscht heit kee Fleesch mehr esse.
Frigadelle, Schdeeg un Broode
sinn in de Kich ab heit verboode.
Sunscht grieschs an die Erbs – wersch bleed –
doch fer manchen is des schun zu schbäät.
Die waren friher schun beklobbt,
do war des Vieh no net gedobbt.
Hosch no keen Magge, frogsch heit dich:
„Was bring ich morje uff de Disch?“
Beim Schwein, beim Fisch un Feddervieh
hosch wennich Fleesch un meh Chemie.
Brauchsch kee Pille, kee rote, kee gelwe –
frischd drei Schnitzel, hosch genau desselwe.
Awwer fihlsch dich gsund un soll’s so bleiwe,
musch des ganze Viehzeich meide.
Mit Nuudle, Gemiees, kannsch nix verderwe –
un hosch een Vordeel: Duschd gsinder schderwe.
Fer de Eene de Euro – fer de Anner de Teuro
Was hemmer friher uns uffgereecht,
wann uns en Hännler hott neigeleecht.
Heit isses denne ehr Schderge,
zu bscheisse uhne dass mers merge.
S’is jo aach e Leichdichkeit,
denn in em halwe Johr ist EURO-Zeit.
Dennoch hemmer die D-Mark ball vergesse –
un bis mer Worscht saache kenne, hawwe die se
gfresse.
Die beisse heit schun fescht in de Kuche
un de Rescht griehmer 2002 zum versuche.
Hiegschmisse wie en Knoche em Hund
kannsch net verschdigge, die Brogge sin rund.
A Sache zum alde Preis kannsch no hawwe
halt mit wennischer drin – un ausse meh Babbe.
Jezzat werre die Ardiggel gedrimmt,
dass es noochher middem EURO schdimmt.
Die halde uns fer dumm un dimmer
un glaabt mer’s: S’kummt noch schlimmer!
Verkaaft der Eeni beleechde Breetscher uff d’Hand,
musch 15 Cent meh berabbe –
weil die Bägger 5 Cent uffgschlaahe hawwe.
Dann sin die 10 Cent fer die Zeit – heert, heert –
wu die Verkeiferin dich hott uffgeklärt.
Liewer Keifer loss der saache: Rabadde werre vorher druffgeschlaache!
„Derfs e bissel meh sei?“, hosch friher gheert,
doch heit ischs grad wie umgekeert.
Heit empfinne die Verkeifer Quale
wann froogsch: „Derf ich e bissel wennicher
bezaale?“
Reitschd schdolz in de Laade uffem deire Geilche,
drin machschd de Ärmscht – des nennt mer
feilsche.
Gelernt hosch des im Land der Pyramide
