0,99 €
Mehr erfahren.
- Herausgeber: Books on Demand
- Kategorie: Gesellschafts- und Liebesromane
- Sprache: Deutsch
Der Ackermann von Böhmen hat viele Namen. Fakt ist aber, dass diese spezielle Geschichte mehrere hundert Jahre alt ist und als Teil des frühen Humanismuses gelten kann.
Das E-Book können Sie in Legimi-Apps oder einer beliebigen App lesen, die das folgende Format unterstützen:
Seitenzahl: 47
Veröffentlichungsjahr: 2021
Ähnliche
Der Ackermann von Böhmen
Der Ackermann von BöhmenAnmerkungen zu dieser AusgabeImpressumDer Ackermann von Böhmen
Der Ackermann. Das erste capitel Grimmiger tilger aller leute, schedlicher echter aller werlte, freissamer morder aller menschen, ir Tot, euch sei verfluchet! Got, ewer tirmer, hasse euch, vnselden merung wone euch bei, vngeluck hause gewaltiglich zu euch: zumale geschant seit immer! Angst, not vnd jamer verlassen euch nicht, wo ir wandert; leit, betrubnuß vnd kummer beleiten euch allenthalben; leidige anfechtung, schentliche zuversicht vnd schemliche verserung die betwingen euch groblich an aller stat; himel, erde, sunne, mone, gestirne, mer, wag, berg, gefilde, tal, awe, der helle abgrunt, auch alles das leben vnd wesen hat, sei euch vnholt, vngunstig vnd fluchen euch ewiglichen! In bosheit versinket, in jamerigem ellende verswindet vnd in der vnwiderbringenden swersten achte gotes, aller leute vnd ieglicher schepfung alle zukunftige zeit beleibet! Vnuerschampter bosewicht, ewer bose gedechtnuß lebe vnd tauere hin on ende; grawe vnd forchte scheiden von euch nicht, ir wonet wo ir wonet: von mir vnd aller menniglich sei vber euch ernstlich zeter geschriren mit gewundenen henden!
Der Tot. Das ander capitel Horet, horet, horet newe wunder! Grausam vnd vngehorte teidinge fechten vns an. Von wem die kumen, das ist vns zumale fremde. Doch drowens, fluchens, zetergeschreies, hendewindens vnd allerlei angeratung sein wir allen enden vnz her wol genesen. Dannoch, sun, wer du bist, melde dich vnd lautmere, was dir leides von vns widerfaren sei, darvmb du vns so vnzimlich handelst, des wir vormals vngewonet sein, allein wir doch manigen kunstenreichen, edeln, schonen, mechtigen vnd heftigen leuten sere vber den rein haben gegraset, davon witwen vnd weisen, landen vnd leuten leides genugelich ist geschehen. Du tust dem geleich, als dir ernst sei vnd dich not swerlich betwinge. Dein klage ist one done vnd reime; davon wir prufen, du wellest durch donens vnd reimens willen deinem sinn nicht entweichen. Bistu aber tobend, wutend, twalmig oder anderswo one sinne, so verzeuch vnd enthalt vnd bis nicht zu snelle so swerlich zu fluchen den worten, das du nicht bekummert werdest mit afterrewe. Wene nicht, das du vnser herliche vnd gewaltige macht immer mugest geswechen. Dannoch nenne dich vnd versweig nicht, welcherlei sachen dir sei von vns so twenglicher gewalt begegent. Rechtfertig wellen wir werden, rechtfertig ist vnser geferte. Wir wissen nicht, wes du vns so frevelich zeihest.
Der Ackerman. Das III. capitel Ich bins genant ein ackerman, von vogelwat ist mein pflug, vnd wone in Behemer lande. Gehessig, widerwärtig vnd widerstrebend sol ich euch immer wesen: wann ir habt mir den zwelften buchstaben, meiner freuden hort, aus dem alphabet gar freissamlichen enzucket; ir habt meiner wunnen lichte sumerblumen mir aus meines herzen anger jemerlich ausgereutet; ir habt mir meiner selden haft, mein auserwelte turteltauben arglistiglichen entfremdet: ir habt vnwiderbringlichen raub an mir getan! Weget es selber, ob ich icht billich zurne, wute vnd klage: von euch bin ich freudenreiches wesens beraubet, tegelicher guter lebetage enterbet vnd aller wunnebringender rente geeussert. Frut vnd fro was ich vormals zu aller stunt; kurz vnd lustsam was mir alle weile tag vnd nacht, in geleicher masse freudenreich, geudenreich sie beide; ein iegliches jar was mir ein gnadenreichs jar. Nu wirt zu mir gesprochen: schab ab! bei trubem tranke, auf durrem aste, betrubet, swarz vnd zersorend beleib vnd heul on vnderlaß! Also treibet mich der wint, ich swimme dahin durch des wilden meres flut, die tunnen haben vberhant genumen, mein anker haftet nindert. Hiervmb ich on ende schreien wil: Ir Tot, euch sei verfluchet!
Der Tot. Das IV. capitel Wunder nimpt vns solcher vngehorter anfechtung, die vns nimmer hat begegent. Bistu ein ackerman wonend in Behemer lande, so dunket vns, du tust vns heftiglich vnrecht, wann wir in langer zeit zu Behem nicht endeliches haben geschaffet, sunder nu newlich in einer festen, hubschen stat, auf einem berge werlich gelegen; der haben vier buchstaben: der achzehende, der erste, der dritte vnd der drei vnd zwenzigiste in dem alphabet einen namen geflochten. Da haben wir mit einer erberen seligen tochter vnser genade gewurket; ir buchstabe was der zwelfte. Sie was ganz frum vnd wandelsfrei, wann wir waren gegenwurtig, do sie geboren wart. Do sante ir fraw Ere einen gerenmantel vnd einen erenkranz; die brachte ir fraw Selde. Den mantel vnd den erenkranz brachte sie ganz, vnzerissen vnd vngemeiligt mit ir vnz in die gruben. Vnser vnd ir gezeuge ist der erkenner aller herzen. Guter gewissen, fruntholt, getrew, gewere vnd zumale gutig was sie gen allen leuten. Werlich so stete vnd so geheure kam vns zu handen selten. Es sei dann die selbe die du meinest: anders wissen wir keine.
Der Ackerman. Das V. capitel Ja herre, ich was ir friedel, sie mein amye. Ir habt sie hin, mein durchlustige augelweide; sie ist dahin, mein frideschilt vur vngemach; enweg ist mein warsagende Wunschelrute. Hin ist hin! Da stee ich armer ackerman allein; verswunden ist mein lichter stern an dem himel; zu reste ist gegangen meines heiles sunne: auf geet sie nimmermer! Nicht mer geet auf mein flutender morgensterne, gelegen ist sein schimmern, kein leitvertreib han ich mer: die finster nacht ist allenthalben vor meinen augen. Ich wene nicht, das icht sei, das mir rechte f reude immermer muge widerbringen, wann meiner freuden achtber banier ist mir leider vndergangen. Zeter! waffen! von herzengrunde sei geschriren vber das verwassen jar, vber den verworfen tag vnd vber die leidigen stunde, darin mein steter, herter diamant ist zerbrochen, darin mein rechte furender leitestab vnbarmherziglich mir aus den henden wart gerucket, darin ist zu meines heiles vernewendem Jungbrunnen mir der weg verhawen. Ach on ende, wee on vnderlaß vnd jameriges versinken, gefelle vnd ewiger fal sei euch Tot zu erbeigen gegeben! Lastermeiliger, schandengiriger, wirdenloser vnd grisgramiger sterbet vnd in der helle erstinket! Got beraube euch ewer macht vnd lasse euch zu puluer zerstieben! One zil habet ein teufelisch wesen!
Der Tot. Das VI. capitel.
