Es ware moh E-Book

Josef Peil

• Herausgeber: Rhein-Mosel-Vlg
• Kategorie: Fantasy und Science-Fiction
• Sprache: Deutsch

Seitenzahl: 147

Veröffentlichungsjahr: 2018

Beschreibung

Josef Peil erzählt 20 Märchen neu in seiner Hunsrücker Mundart und versucht damit, den Märchen im Grimmschen Sinne neuen Geschmack zu verleihen. Durch Erzählen wird Beziehung zwischen Menschen gestiftet und gepflegt. Mit Märchen und Mundart kann man nicht früh genug beginnen. Salopp ausgedrückt: Märchen und Mundart machen schlau.

Leseprobe

© 2018 – e-book-Ausgabe RHEIN-MOSEL-VERLAG Zell/Mosel Brandenburg 17, D-56856 Zell/Mosel Tel [phone] Fax [phone] Alle Rechte vorbehalten ISBN 978-3-89801-885-2 Ausstattung: Stefanie Thur Titelbild: Hänsel and Gretel; Darstellung von Alexander Zick (1845–1907)

Josef Peil

Es ware moh

Märcher uff Hunsrücker Platt

Rhein-Mosel-Verlag

Im Vorwort ihrer Erstausgabe der Märchen schreiben die Brüder Grimm:

»Wären wir so glücklich gewesen, sie in einem recht bestimmten Dialect erzählen zu können, so zweifeln wir nicht, würden sie viel gewonnen haben; es ist hier ein Fall, wo alle erlangte Bildung, Feinheit und Kunst der Sprache zu Schanden wird, und wo man fühlt, daß eine geläuterte Schriftsprache, so gewandt sie in allem andern seyn mag, heller und durchsichtiger aber auch schmackloser geworden, und nicht mehr fest an den Kern sich schließe.«

Volksmärchen wurden nicht in hochdeutsch erzählt, Volksmund spricht Mundart.

Die Bundesregierung trat 2012 der Unesco-Konvention zum Schutz immateriellen Kulturgutes bei und deklarierte Märchen und Mundart als schützenswertes Kulturgut.

Mit diesem Anliegen erzählt Josef Peil Märchen neu in seiner Hunsrücker Mundart und versucht damit, den Märchen im Grimmschen Sinne neuen Geschmack zu verleihen. Durch Erzählen wird Beziehung zwischen Menschen gestiftet und gepflegt. Mit Märchen und Mundart kann man nicht früh genug beginnen. Salopp ausgedrückt: Märchen und Mundart machen schlau.

Die Ortsmundarten sind erstaunlicherweise noch immer deutlich verschieden. Darum ist es notwendig, beim Lesen und Vorlesen die Texte in die eigene Ortsmundart zu übertragen. So möchte dieses Buch anregen und helfen, nicht nur vorzulesen, sondern auch frei zu erzählen. Denn dabei kommt Fantasie zum Tragen, Märchen sind ja aus sprudelnder Fantasie entstanden.

Ascheputtel

Eme reiche Mann is die Fraa krank wor. Wie se gefühlt hot, dass es ans Enn gang is, hot se ehr äänzich Töchterche bei sich ans Bett geruf unn saht: »Mei liewes Kind, bleib fromm unn gut, dann weerd der de liewe Gott immer helfe, unn eich will vum Hiemel runner immer uf dich gucke unn um dich rum sin.« Domit hot se die Aue zugemach unn is gestoreb. Das Mädche is jede Daach ans Grab vun der Mutter gang, hot gekrisch unn is fromm unn gut geblieb. Wie de Winter kam, hot de Schnee ein weiß Tuch uf’s Grab gedeckt, unn wie es Friehjohr das wiere runnergezoh hatt, hot de Mann sich en anner Fraa genomm.

Die Fraa hatt zwei Tööchter mit ins Haus braacht, wo zwar schön mit weißer Haut ware, awer im Herz borstich unn schwarz. Do hot en schlimm Zeit for das arem Stiefkind aangefang. »Soll die dumm Gans bei uus in der Stuh hucke?«, sahre se. »Wer Brot essen will, muss es verdiene! Naus mit der Küchemaad.« Se honn em die schöne Klärer abgenomm unn en alte grohe Kierel unn Holzschuh aangedon. »Guckt emoh do die stolz Prinzessin, wie se uffgeputzt ist!«, honn se geruf, gelacht unn’s in die Küch gefohrt. Do musst’s vun morjens bis omends schwer schaffe, vor Daach ufsteihe, Wasser schläpe, Fouer aanmache, koche unn wäsche. Noch dezu honn em die Schwestere alle miehliche Schikane aangedon, honn sich iewer’s lustich gemach unn Erwes unn Linse in die Äsch geschutt, dass es se wiere rauspule musst.

Omends, wenn’s mied geschafft war, konnt’s in känem Bett schlofe, musst sich newer de Herd in die Äsch lehe. Unn weil’s deswehe immer staawich unn dreckich ausgesiehn hot, honn se’s Ascheputtel gehäß.

Änes Daachs wollt de Vadder uf de Maart fahre. Do horr-er die zwei Stieftööchter gefroht, was er’n mitbrenge sollt. »Schöne Klärer«, saht die än, »Perle unn Edelstän« die anner. »Awer dou, Ascheputtel«, sahr-er, »was willst dou honn?«

»Vadder, es erste Ästche, wo der uf em Hämweech an de Hut stößt, das brech mer ab.« Er hot nou for die Stieftööchter schöne Klärer, Perle unn Edelstän kaaft unn uf em Hämweech, wie er dorch en griene Wald geriet is, hot em en Hasel-ästche de Hut vum Kopp gezoh. Do horr-er das Ästche abgebroch unn mitgenomm. Wie er häm kam, horr-er de Stieftööchter genn, was die sich gewünscht harre unn dem Ascheputtel das Ästche vum Haselstrauch. Ascheputtel hot sich bedankt, is ans Grab vun der Mutter gang, hot das Ästche do ingeplanzt unn so gekrisch, dass ehr Träne das Plänzje gewässert honn. Das is gewachs unn en schöner Baam wor. Ascheputtel is dreimoh de Daach ans Grab gang, hot gekrisch unn gebet, unn jedesmoh kam en weiß Vählche uf de Baam. Unn wenn Ascheputtel en Wunsch laut gesaht hot, hot em das Vählche runner geworef, was es sich gewünscht hatt.

Nou hot awer de Könich en Fest ingeriecht, wo drei Daach dauere sollt unn wo alle junge Mäd im Lann ingelad wor sinn, dass de Prinz sich en Braut aussuche könnt. Wie die zwei Stiefschwestere gehort honn, dass se aach ingelad wäre, harre se Spaß, honn Ascheputtel geruf unn sahre: »Kämm uus die Hoor, beerscht uus die Schuh un mach uus die Schnalle fest. Mer gehnn uff die Huckset uff’s Schloss vum Könich.« Ascheputtel hot gefollicht, awer aach gekrisch, weil’s doch aach gere tanze gang wär, unn bei der Stiefmutter geberelt, dass die’s gehn losse sollt. »Dou Ascheputtel«, saht die, »bist voll Staab unn Dreck unn willst uff die Huckset? Dou host kä Klärer unn Schuh und willst tanze!« Wie’s awer nitt ufgehort hot ze berele, saht se endlich: »Do honn ich der en Schüssel Linse in die Äsch geschutt, wenn de die Linse in zwei Stunn wiere ausgeles host, derfst de mitgehn.«

Das Mädche is dorch die Hinnerdeer in de Garde unn hot geruf: »Dehr zahme Täibcher, liewe Täibcher, all dehr Vählcher unner’m Hiemel, kommt unn heleft mer reffe, die gure ins Dibbche, die schleechte ins Kröbbche.«

Do kame dorchs Küchefinster zwei weiße Täibcher, dann noch e paar unn endlich de ganze Schwarm Vähl unner’m Hiemel unn honn sich in die Äsch gehuckt. Unn die Täibcher honn mit de Köppcher genickt unn aangefang pick pick pick pick unn do honn aach die annere aangefang pick pick pick pick unn honn all die gure Körncher in die Schüssel gedon. Kaum en Stunn war rum, do ware se schun fertich unn sinn all wiere es Finster nous. Do hot das Mädche die Schüssel der Stiefmutter braacht, hot sich gefreit unn gemänt, nou derf’s aach mit uf die Huckset. Awer die Stiefmutter saht: »Nää, Ascheputtel, dou host kä Klärer unn kannst nitt tanze. Dou weerst nor ausgelacht.« Wie’s nou awer so gekrisch hot, saht se: »Wenn de mer zwei Schüssele voll Linse in äner Stunn aus der Äsche lese kannst, kannst de mitgehn«, unn daacht, das schafft se nie.

Wie se die zwo Schüssele in die Äsch geschutt hatt, is das Mädche dorch die Hinnerdeer in de Garde unn hot geruf: »Dehr zahme Täibcher, liewe Täibcher, all dehr Vählcher unner’m Hiemel, kommt unn heleft mer reffe, die gure ins Dibbche, die schleechte ins Kröbbche.«

Do kame dorchs Küchefinster zwei weiße Täibcher, dann noch e paar unn endlich de ganze Schwarm Vähl unner’m Hiemel unn honn sich in die Äsch gehuckt. Unn die Täibcher honn mit de Köppcher genickt unn aangefang pick pick pick pick unn do honn aach die annere aangefang pick pick pick pick unn honn all die gure Körncher in die Schüssele gedon. Unn ehb en haleb Stunn rum war, ware se schun fertich unn sinn all wiere nous gefloh. Do hot das Mädche die Schüssele der Stiefmutter getrahn, hot sich gefreit unn gemänt, nou derf’s mit uf die Huckset gehn. Awer die Stiefmutter saht: »Es hileft der alles nix; de kimmst nitt mit, de host kä Klärer und kannst nitt tanze; mer müsste uus mit der schäme.« Domit hot se’m de Buckel gewies unn is mit ehre zwei Tööchter fort.

Wie nou niemand meh dehäm war, is Ascheputtel ans Grab vun seiner Mutter gang, hot sich unner de Hasel gestallt unn geruf: »Bäämche, rissel dich unn schierel dich, werf Gold unn Silwer iewer mich.«

Do hot em de Vohl en golden Kläd runner geworef unn mit Säire unn Silwer bestickte Pantoffel. In aller Eil hot’s das aangedon unn is uf die Huckset gang. Sei Schwestere unn die Stiefmutter honn’s nitt kannt unn gemänt, das müsst en fremm Könichstoochter sin. So schön hot’s in dem goldene Kläd ausgesiehn. An Ascheputtel honn se nitt gedaacht unn gemänt, das tät dehäm im Dreck sitze unn die Linse aus der Äsch pule. De Könichssuhn is bei Ascheputtel gang, hot’s bei der Hand genomm unn mit em getanzt. Er wollt aach suns mit käner annere tanze unn hot sei Hand nimmee gehn geloss. Wenn en annere kam, for um en Tanz ze frohe, sahr-er: »Das is mei Mädche.«

Ascheputtel hot getanzt, bis es Omend war. Do wollt’s häm gehn. De Könichssuhn saht awer: »Eich gehn mit der.« Er wollt nämlich siehn, wo das schön Mädche hien gehort hot. Das is em awer fort geflutscht unn in de Taueschlaach gesprung. Nou hot de Könichssuhn gewart, bis de Vadder kam, unn saht dem, das fremm Mädche wär in de Taueschlaach gesprung. De Alt daacht: »Sollt das es Ascheputtel sin? Mit ner Ax horr-er de Taueschlaach ausenanner geschlahn, awer es war niemand drin. Wie se ins Haus kame, hot Ascheputtel in seine dreckiche Klärer in de Äsch gelehn, es war nämlich flott aus dem Taueschlaach hinne raus gesprung unn bei die Hasel gelaaf. Do hatt’s die schöne Klärer ausgedon unn uf’s Grab gelaacht, unn de Vohl hot se wiere fortgehult. Dann hatt Ascheputtel sich in seinem grohe Kierelche in de Küch bei die Äsch gehuckt. Am nächste Daach, wie das Fest nou aangefang hot unn die Eltere unn Stiefschwestere fort ware, is Ascheputtel bei die Hasel gang unn saht: »Bäämche, rissel dich unn schierel dich, werf Gold unn Silwer iewer mich.«

Do hot de Vohl en noch viel schöner Klääd runner geworef wie am voriche Daach. Unn wie Ascheputtel mit dem Klääd uf die Huckset kam, honn se all nor so gestaunt. De Könichssuhn hatt uf’s gewart, hot’s bei der Hand genomm unn nor mit ihm getanzt. Wenn annere kame for mit em ze tanze, sahr-er: »Das is mei Mädche.« Wie’s Omend war, wollt’s fort, unn de Könichssuhn is em noh, wollt siehn, in was for Haus es gäng. Awer es is in de Garte hinner’m Haus gesprung. Do hot en schöner großer Baam gestann, wo die allerbeste Beere draan gehonk honn. Flink wie en Eichhörnche is es do nuff, unn de Könichssuhn wusst nitt, wo’s war. Er hot gewart, bis de Vadder kam, unn saht iewer dene: »Das fremm Mädche is mer fort geflutscht, eich glaab, es is uf de Beerebaam gesprung.« De Vadder daacht: Sollt das es Ascheputtel sin? Er hot sich die Ax hule geloss unn de Baam umgehau, awer do war niemand druff. Unn wie se in die Küch kame, hot Ascheputtel in der Äsch gelehn wie suns aach. Es war uf der anner Seit vum Baam runner gesprung, hatt dem Vohl uf em Hasel die schöne Klärer wiere braacht unn sei groh Kierelche aangedon.

Am dritte Daach, wie die Eltere unn Schwestere fort ware, is Ascheputtel wiere ans Grab vun seiner Mutter unn saht iewer das Bäämche: »Bäämche, rissel dich unn schierel dich, werf Gold unn Silwer iewer mich.«

Nou hot em de Vohl en Klääd runner geworef, das war so prächtich unn glänzich, wie’s noch nie äns hatt, unn die Pantoffel ware ganz aus Gold. Wie’s in dem Kläd uf die Huckset kam, wusste se all vor Staune nix meh ze sahn. De Könichssuhn hot nor mit ihm getanzt unn wenn en annere mit em tanze wollt, sahr-er: »Das is mei Mädche.«

Wie’s Omend wor is, wollt Ascheputtel fort, unn de Könichssuhn wollt mit em gehn, awer es is so flink fort gesprung, dass er nitt noh kam. Awer de Könichssuhn hatt raffineert vorgesoricht unn die ganz Trepp mit Pech bestreiche geloss. Do draan war de linkse Pantoffel vun dem Mädche hänge geblieb. De Könichssuhn hot en ufgehob, unn er war so klän unn so fein unn ganz aus Gold. De nächste Morje is er bei de Mann unn saht: »Kä anner soll mei Könichin weere als wie die, wo de golden Schuh an de Fuß passt.«

Do harre die zwei Schwestere Spaß, weil se schöne Fieß harre. Die ältst is mit dem Schuh in die Kammer unn wollt en aanproweere, unn die Mutter hot debei gestann. Awer se kam mit de große Zeh nit nin, de Schuh war ehr zu klän. Do hot ehr die Mutter en Messer genn unn saht: »Hau die Zeh ab; wenn d Könichin bist, brauchst de nitt zu Fuß ze gehn.«

Das Mädche hot de Zeh abgehau, de Fuß in de Schuh gezwängt, die Pein verbiss unn is naus bei de Könichssuhn. De hot se als sei Braut uf de Gaul gehob unn is mit ehr fort geriet. Se musste awer an dem Grab langst, do honn die zwei Täibcher uf em Hasel gehuckt unn geruf:

»Rucke di gu, rucke di gu,

Blut is im Schuh.

De Schuh is zu klän,

die richtich Braut huckt noch dehäm.«

Do horr-er uf de Fuß geguckt unn es Blut rauskomme gesiehn. Er hot seine Gaul gewandt, die falsch Braut wiere häm braacht unn saht: »Das is nitt die richtich, die anner Schwester soll de Schuh antun.« Do is die in die Kammer gang, kam aach glücklich mit de Zeh in de Schuh, awer die Ferscht war zu groß. Do hot ehr ehr Mutter en Messer genn unn saht: »Hau en Stück von der Ferscht ab. Wenn de Könichin bist, brauchst de nimmee zu Fuß ze gehn.« Das Mädche hot en Stück vun seiner Ferscht abgehau, de Fuß in de Schuh gezwängt, die Pein verbiss unn is naus bei de Könichssuhn. Do horr-er se als sei Braut uf de Gaul gehob unn is mit ehr fort geriet. Wie se an dem Hasel langst kame, honn die zwei Täibcher druff gehuckt unn geruf:

»Rucke di gu, rucke di gu,

Blut is im Schuh.

De Schuh is zu klän,

die richtich Braut sitzt noch dehäm.«

Er hot uf de Fuß geguckt unn gesiehn, wie es Blut aus em Schuh raus an de Strümp hoch gestieh is. Er hot seine Gaul gewandt unn die falsch Braut wiere häm braacht. »Das is aach nitt die richtich«, sahr-er, »hot dehr kä anner Toochter?«

»Nä«, saht de Mann, »nor vun meiner erst Fraa is noch ein klä Ascheputtel do. Das kann unmiehlich die Braut sin.« De Könichssuhn saht, er soll’s hoch schicke, awer die Mutter saht: »Och nää, das is viel zu dreckich, das derf sich nitt blicke losse.« Er wollt das awer unbedingt honn unn Ascheputtel hot müsse geruf were. Do hot sich’s erst Hänn unn Gesicht gewäsch, is dann gang unn hot vor dem Könichssuhn en Diener gemach. De hot em de goldene Schuh hiengehall. Do hot sich’s uf en Kniebänkche gehuckt, hot de Fuß aus dem schwere Holzschuh gezoh unn in de Pantoffel gestoch. De hot gepasst wie aangegoss. Unn wie Ascheputtel ufgestann is unn dem Könichssuhn ins Gesicht geguckt hat, hot de’s wiere kannt as das schön Mädche, wo mit em getanzt hatt, unn hot geruf: »Das is die richtich Braut.« Die Stiefmutter unn die zwei Schwestere sinn verschrock unn blass wor vor Ärjer. De Könichssuhn awer hot Ascheputtel uf de Gaul gehob unn is mit em fort geriet. Wie se an dem Hasel langst kame, honn die zwei Täibcher geruf:

»Rucke di gu, rucke di gu,

kä Blut ist im Schuh.

De Schuh is nitt zu klän,

die richtich Braut, die fehrt er häm.«

Unn wie se das geruf harre, kame se gefloh unn honn sich dem Ascheputtel uf die Schuller gehuckt, äns rechts, das anner links, unn do sinn se hucke geblieb.

Wie die Huckset gehall were sollt, kame die falsche Schwestere, wollte freindlich tun unn Antäl honn am Glück. Wie das Paar nou in die Kerich gang is, is die ältst Schwester rechts, die jüngst links vun en gang. Do honn die Tauwe jeder en Au ausgepickt. Unn wie se wiere aus de Kerich kame, is die ältst links unn die jüngst rechts. Do honn die Tauwe jeder das anner Au ausgepickt. So ware se wehe ehrer Boshaftigkät unn Falschhät for ehr Lebdaach mit Blindhät bestroft.

Das bloh Liecht

Es war emoh en Soldat, de hatt dem Könich lange Johre gut unn ehrlich gedient. Wie awer de Kriech aus war unn de Soldat wehe de viele Blessure, wo er krieht hatt, nimmee weirer diene konnt, saht de Könich iewer’n: »De kannst hämgehn, eich brauch dich nimmeh. Geld kriehst de käns vum-mer, suns Lohn krieht nor, wer ebbes for meich tut.«

Do wusst de Soldat nitt, vun was er nou lewe sollt. Voller Sorje is er fort gang unn gang unn gang, de ganze Daach, bis er omends in en Wald kam. Wie’s dunkel wor is, horr-er en Liecht gesiehn, is druff zu gang unn kam an en Haus, wo en Hex drin gewohnt hot.

»Geb mer en Schlofplatz unn ebbes ze esse unn ze trinke, suns verkomme eich«, sahr-er.

»Oho«, saht die Hex, »wer kann dann schun jedem Stromer ebbes ze esse genn? Awer eich will nitt so sin und dich uffnemme, wenn de tust, was eich verlange.«

»Was willst de?«, hot de Soldat gefroht.

»Dass de mer morje meine Garte umgrabst«, saht die Hex.

De Soldat hot jo gesaht unn de nächste Daach schwer geschafft. Er konnt awer vor Omend nitt fertich were. »Eich siehn«, saht die Hex, »dass dou hout nitt meh weirer kannst. Eich will dich noch en Naacht behalle, dafor sollst de mer morje en Wahn Holz klänmache.«