Dumm gebabbelt is glei E-Book

Wolfgang Käser

• Herausgeber: Books on Demand
• Kategorie: Gesellschafts- und Liebesromane
• Sprache: Deutsch

Seitenzahl: 51

Veröffentlichungsjahr: 2016

Beschreibung

Des sin alles Korzgeschichte vumme hunnerdprozendische Pälzer. Beschriwwe werren dort Erlebnisse, Erfahrunge beim Zuhöre un Zugugge Vielleicht hot mancher odder manchi vun Eich schun ähnliches erlebt. Dumm babble duen blos die Annere, mir doch net....... Sgibt noch so e Bichl vun mir: "Makaweres fer Unempfindliche", im selwe Verlach erschiene mit de ISBN Nummer 9783739241340 Ihr werren lache, a des kammer kaafe. Un e Houmpäätsch hawwich a, gut gepflegt vun de Gerlinde Korstick: www.käserkorstick.jimdo.com Dort dürft Ihr was ins Gäschdebuch schreiwe.

Leseprobe

Inhaltsverzeichnis

Karl in de Oper

Moi REHA

Rentnerschdammdisch

Suveniers Suveniers

Oikaafsdaach

Erotik pur

Dumm geloffe

Unnerm Siegel der…

Dumm gebabbelt is glei

Gastbeitrag

De Löwemissionar

Zoff im Senioreheim

De Hochzischdaach

Uffm Fussballplatz

De Jamerlabbe

Am Fahkaadeaudomad

Zugaabe

De Karl in de Oper

Lang, lang hodder gsucht, de Karl. Dann hodder mol geguggt unner dem www.suchderänni.de un is findisch worre. Na ja, sie muss wohl a arg lang gsucht hawwe, sunschd werse ned grad uff de Karl kumme. Alla un wiese sich e bissel gekennt hänn, hot soi Bekanntschaft gemäänt, dem Karl deed e bissel Kuldur wohl ned schade. Sie hodden iwwerred, mit in die Oper zu kumme.

De Karl wa noch nie in so irgendwo was geweßt.

Am Schdammdisch hännsen dann gfroocht, wie des so wa in dere Oper. Ja un a iwwerhaubt wie des dann so is mit dere Fraa. De Karl nimmt erschd noch zwä drei Schluck, dann setzder soi wichdisches Gsicht uff un fangd a zu verzehle:

„Also erschdemol hawwisch mich gewunnerd, dass do so neimodischi Musik gschbielt werd. Do hod jo grad jeder des gschbielt, wasser gewollt hot. Moi Bekannti hot mich dann uffgeklärt, die Musigger missten jetz halt all erschdemol ihr Inschdrumente schdimme. Ich wääs ned, ws an denne Inschdrumende ned gschdimmd hot, awwer ich wollt mich ned blamiere un hab ned weider noochgfroocht.

Mir is glei uffgfalle, dass die Biehn viel klänner wa als wie bei de Helene Fischer. Die Kabell hot deswege im Keller hogge misse, mer hodse kaum gseh.

Ja un dann is uff ämol so alde Graukopp kumme, also so en Friedhofsblonde, der hot vielleicht en komische Kiddel aghabt, der wa hinne viel länger als wie vorne.“

„Vielleicht wa de ganze Kerl ned hinne wie vorne, mer wääses halt ned,“ hot de Hannes gelacht, un dodebei erwardungsvoll in die Runde geguggt, ob die annere a lachen

„Jo“, hod de Karl weiderverzehlt, „des kann schun soi. Awwer die Leid hänn geklatscht wie verriggt, de alde Graue hodd sich umgedreht un middem Schdegge, denner in de Hand ghabt hot, gedroht. Sofort warense all muksmaiselschdill im Keller.“

Ganz gschbannd hänn die Schdammdischbrieder zugheert. Vun denne wa a noch niemols änner in so ebbes. De Karl beschdelld sich noch e Bier un verzehlt weider.„Dann hodder plötzlich alle zwä Händ hochgerisse un schlachadisch widder falle losse. Es is e rischdich höllisches Schbeggdaagel unner de Musigger ausgebroche. Der do vorne hod wie wild mid soim Schdogg rumgfuchdeld, soin Owwerkörwer hot Zuggunge gemacht, wie en zu ald worrener Rockmusiker. Un wie wilder der dann worre is, umso schneller hot die Kabell gschbielt. Un nooch fimpf Minudde hodds denne scheinbar gelangt un sie hänn äfach uffgeheerd zu schbiele. Die Leid sin dodruff faschd ausglippt un hänn geklatscht wie wahnsinnisch.

„Das war die Ouvertüre,“ – hod die wo do rechts newermer ghoggd hot, gemäänt. Vun mir aus!

Un dann is was ganz komisches bassiert, der Kerl middem Schdogg hod dem Geigeschbieler der wo do ganz vorne im Graawe ghockt hot, die Hand gewwe. Scheinbar hodder jetz erschdemol gemerkt, dasser den gekennt hot. Moi Bekanndi hodmer erklärt, des weer de erschde Geiger. Jo, hawwisch gedenkt, sowas ähnliches halt wie en Vorarweider.

De Graukopp do vorne wa jetz e bisssel friedlicher gschdimmt un die Musigger hänn a nimmi so laut gschbielt.

Dann is en Mann uff die Biehn kumme. Hoppla, en Fasnachder, hawwich mer gedenkt, weil der so komisch agezooche wa mid so emme ganz roode Koschdiem un weisse Schdrumphosse. Ja un was hod der Kerl gemacht?“

De Karl lehnt sich zurigg, ganz schdolz, dassem die Annere mool zuheeren, nimmt en Schluck un is ganz vun sich begeischdert, weil die Brieder so gschbannde Gsichter gemacht hänn. Awwer dann verzehlder weider:

„Der arm Kerl hod mindeschdens fimpf Minudde verzweifelt nooch soiner Freundin gerufe, awwer des kenntmer jo, Fraue sin nie pinktlich. Geliebte wo bischtt Du?… Geliebte wo bischd Du?

Dann hodders uffgewwe un hod sich hinner en Busch ghoggd, der grad do rumgschdanne hot. De Beleichder is wahrscheinlcih e bissel oigschloofe gewessd, uff de Biehn do isses nämlich e bissel dunkler worre, den Kerl hinnerm Busch hodmer nimmi gseh.

Uff ämol is e zierlich Persönsche kumme, e Figur grad wie die Wildegger Herzbuwe. Newenanner! Odder wie de weibliche Rainer Calmund. Mid emme sehr weid gschniddene Klääd un emme noch viel, viel weider gschniddene un mehr als iwwermässisch gfillde Ausschnidd. So un jetz rooden emol, was sie gsunge hot??? Owwers glaawen odder ned, die hod mid ennere ganz hohe Schdimm gsunge: Geliebder wo bischd Du? Un des mindeschdens fuffzehmol. Un ich hab mich gewunnerd, dass der Kerl ned hinnerm Busch vorkumme is un a des Publigum kä bissl gholfe hot wie frier beim Kaschberletheader.

Zugewwe, moin Gschmagg wa des Drum vumme Weib a ned.

Dann isser hald doch noch kumme, weilem die Mussiger högschdwahrscheinlich gedroht hänn, sie deeden uffheere zu schbiele, wanner sich jetz ned endlich sehe losse deed. Un jetz heddener doch mol seh misse, was des fer enner vun emme elendische Heuchler wa. Geliebte, da bischt Du un sie hot begeischdert zurickgekrische Geliebter da bist Du!

So is des e paa Minudde hie un hergange, dann isses dem Mann middem Schdogg zuviel worre, er hod de Kabell verboode, weiderzuschbiele. Ab jetz isses e bisselche ruischer worre un ich bin oigepennt. Awwer en Schdoss in moi Ribbe henn mich uffschregge losse.

Uff de Biehn hän jetz e paa annere gsunge, dasse froh weeren, weil sich die Zwää gfunne hedden.

Dann wa Halbzeit. Mir sin nausgeloffe un hänn uns die Fiess verdrede. Gegeseidisch!!! Ich hab rischdich Dorschd ghat, deshalb hawwich moi Ellebooche ausgfahre un zwä Bier gholt. 12 Euro hod des gekoschd, a ich wolld doch ned die ganz Thek kaafe.

Moi Gnädische wolld awwer e Gläsel Sekt. Des heddse a glei saache kenne.

Glei nooch de Paus hänn die im Keller widder en Heidelärm gemacht, jeder hot gschbielt wasser gewollt hot bis dass der Schdockmensch widder kumme is. Sofort wa Ruh im Schdall.

Na ja, ich wills ned zu lang mache gell, awwer de Schluss muss ich Eich noch verzehle.“