He Raru ki Tai E-Book

Jane Cooper

• Herausgeber: Huia Publishers
• Kategorie: Gesellschafts- und Liebesromane
• Sprache: Englisch

Seitenzahl: 67

Veröffentlichungsjahr: 2022

Beschreibung

This is the Māori language edition of To Trap a Taniwha, an adventure story set in seventeenth-century Tāmaki Makaurau Auckland when the hapū of Ngā Oho/Ngā Iwi predominated. Armed with the courage of their convictions, two girls embark on a perilous journey to challenge their leaders' actions. Cousins, Te Kawenga and Kakati learn of a plan being hatched against a neighbouring iwi and strange activity occurring at a seasonal fishing camp. A huge trap is being built to snare and kill Ureia, the taniwha of Hauraki iwi. The cousins fear the retribution that will be taken on their people if Ureia is killed. So they take a dangerous journey to defy the decision of their people and try and save the taniwha.

Leseprobe

Ko tēnei putanga he mea whakaputa e Huia Publishers i te tau 202239 Pipitea Street, Pouaka Poutāpeta 12280Te Whanganui-a-Tara, Aotearoawww.huia.co.nz

ISBN 978-1-77550-723-9 (a-tā)

ISBN 978-1-77550-786-4 (ā-matihiko)

Mana tārua i ngā kōrero © Jane Cooper 2022Mana tārua i ngā pikitia © Story Hemi-Morehouse 2022

Kua noho manatā tēnei pukapuka. Atu i ngā mahi pono e whakaaetia ana i raro i te Ture Manatā, pērā i te akoranga whaiaro, te rangahau, te arohaehae, te arotake rānei, kāore e whakaaetia kia tāia tētahi wāhanga ōna ahakoa te tikanga tā. Me mātua tono whakaae mai i te kaiwhakaputa.

Kei te pātengi raraunga o Te Puna Mātauranga o Aotearoa te whakarārangi o tēnei pukapuka.

I whakawhiwhia te pūrākau He Raru ki Tai ki te Tohu o Te Kahurangi Kāterina Te Heikōkō Mataira o Storylines. He tohu mō tētahi pūrākau i tuhia ki te reo Māori, he mea tautoko ā-pūtea e Huia Publishers.

I whakaputaina me te ringa tautoko a

Ko te putanga matihiko 2022 nā meBooks

He tohu aroha tēnei ki tākumokopuna mātātoa, ki a Hinauri

NGĀ IHIRANGI

1 Te Huānga Pākiki

2 Te Kara a Te Tumu

3 Te Panga a te Ruahine

4 Te Mānukanuka o Hoturoa

5 He Wāhi Punanga

6 He Tohu i te Rire o te Moana

7 Te Mauhere

8 Māturuturu te Wai o Kamo

He Kupu hei Whai atu

Ingoa Wāhi

TĀMAKI-MAKAU-RAU

1

TE HUĀNGA PĀKIKI

Tākiri ake ana te haeata i te umurangi, ka heke iho a Te Kawenga i te ara e pīkau ana i ngā tahā i whītikitia ai ki tāna kawerapa. Ko te hīkoi ki te puna tāna mahi tuatahi o te rā.

‘He mea mōrearea pea te noho o tō tātou papakāinga i waho o Te Ngutu, te waharoa o te pā. Manohi anō, he tino tata rawa tō tātou whānau ki te puna waiora,’ te whakamārama a tōna kuia. E ai ki a Te Kawenga, e kore rawa tēnei kōrero e paku whakamauru i te hōhā o taua mahi.

Ka whai te kōhine nei i ngā maioro o te pā kia puta atu ki te huarahi e ahu atu ana ki ngā ngakinga kai me te puna kei tua atu rā. Kei ngā taha o te huarahi he rākau whau e puāwai ana ānō nei kua ruiruia e te puaheiri. Ohorere ana tāna peke ki te piko o te ara whāiti nei kia kore ai ia e tukia e ngā kaimahi e tākawe ana i ngā kete e kī ana i te kirikiri. I Ōrongonui kua taha ake nei, i rangona tuatahitia ai te tangi a te pīpīwharauroa e kūī ana i te puhikaioreore o te kahikatea. Nā konā, kua tīmata te whakatika i te one mō te awe kāpara.

*

Ka koropiko a Te Kawenga i te puna, ka mihi atu ia ki te hunga e taetae mai ana. Ka āta tō ia i ngā tahā ki te mata o te wai.

‘E kare, kua hoki kē mai tō pāpā i Pūponga?’ Ko te pātai tēnā a tōna tuakana a Kakati.

‘Kāhore anō. E kore ia e hoki tonu mai i mua i te whakaotinga o te para me te ngaki māra.’

‘Pēnei au, he mahi kē atu i te whakarite māra kai e haere ana ki reira, ki taua kūrae.’

‘He aha i pēnā ai ō whakaaro?’

‘Inā tata nei, i te waiwai a Te Tarata mā i ngā aka kareao i te repo, i Ngā Ana Wai, hei kawe atu ki Pūponga.’

‘Kia ahatia?’ te ui a Te Kawenga.

‘Ehara te aka kareao i te taputapu tika hei huhuti pakiaka, nē rā? Ahakoa āku pātai, auare ake. Kāhore tonu rātou i whāki mai i te take o tā rātou mahi.’

‘Kei te whakataka noa iho rātou ki te hī pioke. Mōhio koe, ko Te Tarata te kaiwhakahaere o te taputapu hī. He aha atu anō?’

‘E aua, engari ka whakarongo pīkari ōku taringa ki ā rātou kōrerorero.’

‘Ohiti rawa koe, e hoa,’ te whakatoi a te teina e whakamau ana i ngā kawerapa.

*

Tae rawa atu ki te tomokanga ki ngā māra kai, ka tūtaki atu a Te Kawenga ki tōna whaea, ki a Whiu rātou ko ōna tēina. I te noho te whānau i waho i ngā paenga toka e karapoti ana i te māra.

Ko tā rātou kai he mānga tuna o inapō. I te mau pākē rātou katoa hei ārai i te hauhau o te ata.

‘Kia āta inu i te wai kei pau,’ te kohete a tō rātou whaea. ‘Mō te roanga ake o te rangi taua wai māori. Ākuanei, mā koutou katoa ahau e āwhina ki te whakawhenumi i te pungarehu me ngā kotakota ki te one, kātahi ka rite kia whakatōngia e Kui ngā kōpura kūmara.’

Ka ngoengoe mai tētahi pūkeko kapakapa i aruarumia ai ki waho o te māra e te koroheke, e Te Hape.

‘Aiii ... manu whakahōhā! Kia whakatōngia ngā kōpura, ka whakatūngia he tāepa. Mā tēnā ka ārai atu ēnei whakapōrearea e konihi haere mai nei i te repo,’ tāna kī.

‘Māku a Matua e āwhina ki te whakahie atu ki ngā pūkeko,’ te tohu a Piri.

‘Āhea tō tātou matua hoki mai ai?’ te pātai ohotata a Te Kawenga.

Kīhai tōna whaea i whakahoki kōrero. Kātahi anō ka oti i a ia te kai o te ata te whakapai, ā, kua kotahi atu ia ki ngā kete i whakarārangitia ai kei waho i te wharau o te kaitiaki i te ngakinga. Kei muri i a ia ngā tamariki e tūtārere ana. Ka hiki ngā tēina i ngā kāwai o ngā kete hei kawe atu ki tō rātou ake māra.

‘Kei te mahi ngātahi a Matua rātou ko Te Tarata mā?’ te kimikimi anō a Te Kawenga.

Ka titiro pī a Whiu. ‘E kī, he aha koe e uiui mai nei?’ tāna pātai i a ia e keri ripa ana ki te oneone kua kauhuritia.

‘I pātai mai a Kakati i te aha a Te Tarata mā ki Pūponga.’

‘Hei aha atu mā tō tuakana,’ te kī taikaha a tōna whaea. ‘Hoki iho rā, tiki kete ai.’

*

Nō te poupoutanga o te rā, kua oti te mahi. Nāwai, ka kake ake te whānau i te aupikinga maunga ki tō rātou kāinga. Amuamu ana ngā tamariki i te hiakai.

‘Kāhore e kore kua whakaritea he kai e Hākui mā tātou,’ ngā kupu whakatenatena a tō rātou whaea. ‘Kia manawanui, e āku pī tītī.’

Ka tū noa a Te Kawenga kia pai ai te mātiro atu ki te takutai moana. He tai timu, he rangi paki, mārama noa te kitenga o Te Rōutu o Ureia i tua atu i te Waitematā. Tērā te wā i kitea e ia te wai e kōriporipo ana, e whati ana ki taua ākau, ahakoa marino ana te moana. Ka whakapono mārika ia i te rapirapi te taniwha tapu a Ureia i tōna tuarā ki tōna heru tokatoka.

Nō tētahi pō o Hereturikōkā i te whare tapere, i rangona tuatahitia ai e Te Kawenga ngā pūrākau mō Ureia, mō te taniwha nāna nei te waka o Tainui i ārahi i roto o Tīkapa Moana. E ai ki ngā kōrero, i ētahi wā ka kau tonu atu taua kaitiaki o Hauraki ki te kare kōrekoreko o Te Waitematā. Nā konā, ka mātai ngā karu o Te Kawenga i ia kūrae, i ia ākau moana, nōna e heke iho ana i tōna pā o Maungawhau. I a ia e tamariki ana, ā, ka noho ā-puni te whānau ki te hao ika i te raumati, he horokukū nōna ki te kuhu ki te wai. Otirā ka kī taurangi tōna kuia, mā te whai i ngā tikanga kohikohi mātaitai e noho haumaru ai ia, ka mutu, me uaua kē te wehe atu a Ureia i tōna rua i Te Kirikiri.

*

Nō te tūtakinga atu ki ōna tēina, ka oho mauri rātou i te tioro o te kangakanga a tō rātou kuia. Tae kau anō rātou ki te papakāinga, kua puta kē a Kui i te rua kūmara me te tāhoro i ētahi kōpura ki te papa.

‘Pokotiwha!’ ka hāparangi tōna waha. ‘Pirau katoa. Nā wai tēnei kete kōpura i raweke?’

‘Tē taea e te tangata te kuhu ki roto. Ko koe anake ka uru ki te rua,’ te whakahoki a Whiu kia tau ai tōna wairua. ‘He kōhao pea kei te tuanui. Kua katia tonutia te kūaha i ngā wā katoa.’

Kātahi te kuia ka hoki atu ki roto i te rua, ka mū haere tāna kohukohu i a ia e tirotiro ana i te toenga o ngā kōpura. Ka noho anipā te whānau, he wehi nō rātou he tau nihoroa kei te haere. Ka āwhio a Whiu i te rua kūmara, ka āta whāwhā i te tuanui.

‘Anei te raru,’ ka hamumu tōna waha i a ia e tohu ana i ngā tapa mākini o te rauwhare tōtara. ‘He puare. Kua ngaua e te kiore e ngana ana ki te hou atu.’