Provenzhauptschtadt E-Book

Béla Rothenbühler

• Herausgeber: Der gesunde Menschenversand
• Kategorie: Gesellschafts- und Liebesromane
• Sprache: Deutsch
• Veröffentlichungsjahr: 2021

Beschreibung

Seinen Schwalbensommer stellt sich der Ich-Erzähler Thomas eigentlich anders vor, wenn er sich hin und wieder dem Betrachten der Schwalben am Himmel hingibt. Als Schwalbe, wie Fussballer sie zum Punkteholen produzieren, erlebt er das Verhalten seines Freundes Brazzo. Und damit beginnt sein Absturz. Die beiden Freunde leben in der Provinz. Nicht in der tiefen, meint Thomas, sondern in deren Hauptstadt. Und darauf ist er schon ein wenig stolz. Doch das ändert nichts am leisen Trübsinn, den er nur in wenigen Glücksmomenten vergisst. Unglück in der Liebe vergällt ihm den anfänglich vielversprechenden Sommer der Fussballweltmeisterschaft 2018. Dass dieses Ungemach aber eher komisch als tragisch wirkt, erreicht Béla Rothenbühler, indem er seinen Protagonisten als unzuverlässigen Erzähler immer leicht neben den Dingen und Begebenheiten her räsonieren lässt. Die daraus entspringende ironische Distanz verstärkt er durch die deutliche Markierung des Vokalismus in der Luzerner Mundart. Ein Luzernroman? Unbedingt! Aber für Menschen aller Hauptstädte und Provinzen. Dem Autor gelingt ein humorvoller und einfallsreicher Roman über verpassten Fussball, verpasste Liebe und verpasste Freundschaft, kurz: über eine heutige Lost Generation, die ihre Verlorenheit nicht ganz ernst nimmt.

Leseprobe

BélaRothenbühler

Provenzhauptschtadt

edition spoken script 381. Auflage, 2021© Der gesunde Menschenversand, LuzernAlle Rechte vorbehalten

ISBN: 978-3-03853-169-2eISBN: 978-3-03853-170-8

Lektorat: Daniel Rothenbühler

Herausgeber: Matthias Burki, Ursina Greuel,Tamaris Mayer, Daniel Rothenbühler

Gestaltung: hofmann.to

e-Book: mbassador GmbH, Basel

www.menschenversand.ch

Für N,

Den Sommer meines Lebens.

Täil 1

1. Schwalbe

Ech wörd ned met Schwalben aafo, wenn ke Schwalben ome gsi wärid. Aber: De ganz huere Hemel voll Schwalbe. Schwalbebüüch ond Schwalbeschwänz, wo äifach so omesäglid, voll äis metem Wend, Termik total em Körpergfüel. Die Sieche gschpörid ergendwie, wo dass de Ufwend aafot ond si träit. De ganz Hemel voll. Mosch nome de Chopf chli i Nacke leggen ond: Bämm, Schwalbe.

Ond ech ha de Chopf vell i Nacke gläit e dem Sommer. Oder grad de ganz Körper i di Horizontali: Legeschtuel of de Dachterrassen ond so. Ha die Schwalbe tüüfenentschpannt öber mer lo omesägle, die hend sone Rue usgschtrahlt, hend wahrschiinlech au no käi Jongi e dere Seson. Die chömid de em Herbscht oder so, käi Ahnig.

Aber egal. Dasch so chli de Konsens gsi em Kollegechräis. Chli Pause mache, chli Ferie, chli omeleggen oder omesägle wid Schwalbe. Mängisch scho am Vormettag e Lile näh. De Roschee ond d Madläina send metem Büssli onderwägs gsi: Rechtig Süde. De Simi chli em Schrebergarten am Schaffe, d Mira het e sonere Büvette chli usgholfe. De Täne vell aden Oupen Ers. Dä hani fasch gar ned gseh. As wär er nomol zwänzgi gsi, wahrschiinlech die ganzi Ziit am Tiinis Verruume, käi Ahnig. Ond de Jule het kwasi hauptprueflech kifft.

Jede so chli siis. Jede het sini äigeti Version vo dem Schwalbesommer gha, mos jo jede so entschpanne, wies em guet tuet. Be mer halt primär Dachterrassen ond Lile ond chli probiere z läse, vor allem Krimis ond so, ond chli öber d Schwalben ond alles nochedänke.

Ech ha jo rächt metem Kiffen ufghört ond kes Büssli gha ond Energii au meh so mässig, wel denn esch jo no die Sach met de Schanti gsi. Verzelli de schpöter. Aber schet, nome schnell: Ech ha mech e dem Sommer zom drette Mol e mim Läben ine Schantal verliebt. Zom drette facking Mol. Ond äis Mol krasser as s andere. Aber d Schanti vo dem Sommer esch di schlemmscht gsi vo allnen ond di schönscht. Chonnt alles no. Wo benech gsi? Send grad chli vell Nämen of äinisch, das gsehni, aber falls es öppis helft: D Mira esch mini Metbewohnerin gsi ond de Täne au, ond d Mira esch metem Simi zäme gsi ond früecher mol metem Roschee. Genau, dä metem Büssli. Gsehsch: So chonnt alles zäme. Ond de esch no de Brazzo gsi. Dä het e rächt guete Dschob gha e dem Sommer, är esch Schportschurni gsi bem Chäsblatt, rächt aaschtändig zahlt. Het öber gwössi WM-Schpeli mösse schriiben ond au so Vorprecht ond Expertemäinig ond so, si hend sech glaub z drette das Pensom täilt bem Chäsblatt. Dä het secher drüü Läppen öbercho pro Artekel ond är het mäischtens äifach äine vode Südtütschen abgschrebe. Nomeno so chli Pronome gänderet ond de Schtil chli verschlechteret, demet de Artekel besser e üses Chäsblatt passt.

Ech hanen emmer gfrogt: Wiso di Südtütschi? Wär jo schlauer gsi, chli d Kwelle z variiere, dasch onuffelliger ond es get jo secher anderi Ziitige, wo eri Artekel no chli schneller em Netz hend as di Südtütschi. Aber de Brazzo het gsäit: Wennd scho chlausch, de chasch grad de gueti Schet näh. Ond: Är häig die Sieche no nie verschtande, wo em Coop am Selftscheckaut chlauid ond de gliich nome Prigarantii-Züüg iipackid. Wenn är chlaui, denn nome Fäinfuud.

Ond das het mer äigentlech no iiglüüchtet.

Ech mos grad no chli vom Brazzo verzelle. Wel dä esch kwasi mine bescht Kolleg gsi e dem Sommer. Wobii: Bescht Kolleg esch jo chli wie Lieblingstier. Das hesch as Chend ond so, ond dasch guet ond wechtig, dass das hesch, aber öppe met achtzähni fosch afo merke, dass das rächt könschtlechi Kategoriie send ond dass dech das Leibel ned wörk wiiterbrengt. Get halt Kollegen ond get halt Tier. Mos me jo ned so dörenomeriere. Klar fendsch gwössi e gwössne Momänt besser as anderi, aber do mos me sech jo ned so feschtlegge, fendech.

Esch jedefalls e guete Tüp gsi, de Brazzo, ond au gar ned so kriminell, winer emmer to het, das heter meh so omeverzellt, zom Fraue beiidrocke. Das chönd au nomeno so Lüüt wi de Brazzo: Met somene bellige Bädboi-Imitsch cho, ond de fonkzionierts sogar mängisch no. Aber ebe sösch e Guete. Mer hend Aafangs WM amigs zäme d Mätsch gluegt, s Eröffnigsschpel be üs, wel denn heter jo au no ede WG gwohnt. E dem Zemmer, wo jetz de Simi esch.

Ond anderi Mätsch hemmer em Pablic Viuing gluegt, zom chli onderd Lüüt cho. Send emmer es gliiche ggange, äifach das, wo am nöchschte bede WG gsi esch. Dasch wine Kwartierbäiz e somene WM-Sommer, sones Pablic Viuing, do gsehsch emmer die gliiche paar Nase, do kennsch met de Ziit alli, äifach vom Gseh här, s Bier esch äinigermasse chüel ond voll esch nome, wennd Schwiiz schpelt ond abem Viertelfinal.

De Brazzo het sech emmer könschtlech ufgregt, dass die käi Lile servierid e dem Pablic Viuing. De heter amigs chli töibelet am Trese ond de gliich Bier bschtellt för üs bäidi. Dasch so chli sine Humor gsi e dem Sommer. A äim Obig heter drüü verschednigi Servierdüsene gfrogt, was be ehne sone Lile choschti. Ond wie si de Lile do miechid, em Pablic Viuing: Pur, met Tonic oder sogar met Prosecco. Ond jedi Chällnerin het weder gsäit: Sori, si häigid käi Lile. Ond de heter chli hässig to ond de gliich Bier bschtellt. Natürlech nome, wenn öpper zom Beiidrocke debii gsi esch. Wäisch: As hätt es Pablic Viuing so schiggs Züüg of de Charte. Üses het amigs nome scho Müe gha, s Bier äinigermasse chüelzbhalte. Aber das esch halt sine Humor gsi, am Brazzo sine.

Send jo di letschte paar Mol ned mega debii gsi bede WM. Oder bem Fuessball allgemäin. Hend nome s Wechtigschte gluegt ond sälten osswärts. Mäischtens Wechtigers z tue gha. Di letschte paar Turnier jedefalls: För Prüefige lehre, chli omeräisen oder ergendöppis metere Fröndin. Aber dasmol het jo de Brazzo prueflech met Fuessball z tue gha ond ech sösch ned vell bessers. Fröndinne bäidi ned. Ond äifach nome vode Südtütsche plagiiere ohni de Matsch gseh z ha, das wär am Brazzo de doch gäge d Ehr ggange. Sone Schpur prueflechen Ehrgiiz heter glaub gliich gha.

Aber a dem Tag met de Schwalbe, aso denn, womer das so rechtig krass ufgfallen esch met de Schwalben ond de Termik ond so, esch schpelfräi gsi. Oder nome Schäissmätsch. Ond de Brazzo esch wahrschiinlech met äinere vo sine Frauen am See gsi ond het chli picknickt oder gsönnelet oder met äineren em Wasser omegmacht ond gluegt, obers schafft, em chalte See en Erekzion öberzcho. Ech ha das nie gschafft, aber de Brazzo wahrschiinlech scho. Dem esch emmer alles chli liechter gfalle.

Dasch so chli de allgemäini Väib gsi e dem Sommer.

2. Art-Pank

Aber ebe, schpelfräi oder nome Schäissmätsch, Peru-Denemark ond so: Chonnt ofs Gliichen use. Ond so ärnscht hemmers de gliich ned gno met dem WM-Deng, dass mer so öppis hättid mösse gseh. Ech aso of de Dachterrasse: Lile, Schwalbebüüch ond rächt mine Frede.

Chonnt d Mira ofs Dach, wäisch, mini Metbewohnerin. Die het so rötlechi Hoor gha ond rächt e grossi Frässen ond ech wäiss, ech ha die Gschecht met de Schanti noni grad welle verzelle, aber das hanget halt alles chli zäme.

Chonnt d Mira aso ond verzellt vomene Konzärt vo erere Könschtlerkollegin. Ond ohni Schäiss: Die redt nome so vo dere Kollegin. Wie wenn die käi Name hätt, die Kollegin, oder wenn das öppis wär zom Schtolzdrufsii. Dasme Mönsche kennt, wo chönd sengen oder molen oder so. Aber Fraue kommunizierid halt chli andersch. Wörd ech ned säge, wenns ned so wär. Aber esch kes Problem för mech, hanech mech scho voll dra gwöhnt gha. Wel d Mira esch e Gueti gsi: Härz am rechtige Fläck ond so, het halt chli andersch kommuniziert as ech, aber egal. Met anderne Lüüt chasch öberhaupt ned rede.

D Mira het jedefalls welle, dasech metchomen a das Konzärt. De Brazzo chäm au ond d Schanti häig gsäit: Mol luege.

Das het mer denn scho glängt as Argumänt: Mol luege. Dasch zo dem Ziitponkt allgemäin chli mini Haltig ade Schanti gägenöber gsi, wel: Vell anders esch mer jo ned öbrigbblebe.

Be aso mol go luege. Konzärt jo äigentlech ned so miis oder ämo e dem Sommer nömme gsi, de no lieber Peru-Denemark. Ond denn esches au no Pank gsi. Aber so Art-Pank, het d Mira gsäit, ond das weder so komisch betont, das Art, ond d Schanti esch natürlech ned ome gsi. Wel: Art-Pank, das het sone Frau wid Schanti öberhaupt ned nötig, dasch doch es Zäiche vo Wohlschtandsverwahrlosig: Art-Pank.

Deför hets loschtigerwiis Lile ggä e dem Konschtschoppen oder Pankschoppen oder was das gsi esch. De Brazzo het huere Fröid gha, dä het ix Rondine gholt. Das hani jo verzellt, dass dä voll guet verdient het för praktisch noll Ufwand. Wäg dem escher mängisch chli dekadänt onderwägs gsi ond het emmer alli wellen iilade. Dasch denn au weder Brazzo. Ond so nach Lile vier oder füf het sogar dä Art-Pank afo Schpass mache.

Äi Song het e Text gha, wod Frase «Fuck the Police» wörtlech gno het ond chli omegschpelt het met dem Gedankebeld, ond das het üs denn rächt guet gfalle. Wel d Sängerin esch huere schön gsi, öberhaupt ned Pank, sondern met länge blonde Hoor ond eme schöne Sommerchläid, ond wenn so Lüüt ofnere Böhni öber Sex met Polizeschte sengid, het das scho öppis. Das esch voll am Brazzo sine Gschmack gsi ond minen ehrlech gsäit au. Ob das röckbleckend emmer no so guet esch oder ned: Anderi Frog.

Aber egal, s Wechtigen esch äigentlech ersch nachem Konzärt passiert. De het de Brazzo mech ade Schlagzügerin vo dere Art-Pankbend vorgschtellt, dä het die natürlech kennt. Glaub d Schwöschter voneren Ex oder so. Ond de Brazzo het eh emmer öberall öpper kennt. Die esch jedefalls rächt sümpatisch gsi, die Schlagzügerin, het Lisa ghäissen ond au voll okei usgseh. Au wemme natürlech verschtande het, wiso di Blondi vornen ade Böhni gschtanden esch ond ned si.

Aber gliich sehr en aagnähme Mönsch, si het die Art-Pank-Gschecht au ned so hueren ärnscht gno ond näbedra no Psüchologii schtudiert, win ech früecher, ond drom hemmer öppis z rede gha. Hend aso none Lile zäme tronken of d Chöschte vom Brazzo ond ech hätt nedemol Näi gsäit, wenn no ergendöppis gloffe wär met eren a dem Obig, trotz Schanti ond so.

Aber das esch emmer noni s Wechtige. S Wechtigen esch, wie mech de Brazzo vorgschtellt het. Ned wem: Wie. Är het de Lisa gsäit: Dasch öbrigens de Möllertomas, woner üs bednen e Lile id Hand ddröckt het. Ned Tomas oder Töme oder waser sösch amigs gsäit het, ond au kene vo sinen andere Wetze: So: C.G. Jung vode CKW oder so. Welech ha jo denn no as Fermepsücholog gschaffet, zwar ned bede CKW, ond au meh so Hiumen Rissorsses as wörklech Psüchologii, aber schäissegal, näi: Möllertomas, het de Brazzo gsäit.

Ech ha das de zwöscheziitlech weder vergässe, aber schpöter nones paar Mol a das Konzärt mösse dänke. Em Momänt hani nome gfonde: Dasch halt so sine Humor, am Brazzo sine.

Mosi velecht erkläre, die Sach metem Möllertomas. Aber ke Angscht, dasch schnell verzellt. Bede Tütsche het drom a dere WM e Tomas Möller metgschpelt, genau gliich gschrebe wien ech: Thomas Müller. Dä kennt me. Dä esch schones Ziitli debii gsi ond het emmer so gruusigi Gool gschosse, aber deför huere vell ond emmer mega onberächebari. Me het mängisch gmäint, dä sig sälber öberrascht, dass die Siechen inegönd. Äis Gool wüeschter as s andere, aber das het Sischtem gha bem Tomas Möller, das het dä denn scho set Johre so gmacht. Ond ech ha nie e Zämehang gseh zwösche mim Namensvetter, wo emmer so gruusigi, wechtigi Gool gschosse het, ond mer, ämo bes e dem Momänt.

Wel dem hends ebe Möllertomas gsäit ede tütsche Medie, beziihigswiis Müllertomas. Vor allem ede Südtütsche. Velecht hends welle sini liecht püürischi Art abemache, sini Schlaksigkäit ond Bodeschtändigkäit, aber es het emmer au ergendwie liebevoll tönt. Dä esch jo Publikomsliebling gsi ond kwasi Nazionalheld ond voll volksnöch ond so.

Mer het of jede Fall em Läbe no nie öpper Möllertomas gsäit. Wel: Benech Schwenger, oder was? Oder gsehnech ergendwie püürisch uus? Ebe. So wiit ossen ede Provenz hemmer de gliich ned gläbt. Aber de Brazzo het halt ergendwie dä Zämehang gmacht osere Lile-Luunen use ond du frogsch dech jetz, wiso das wechtig esch: Das chonnt alles no.

Die Schlagzügerin, die Lisa, het de Wetz of jede Fall au ned tschegget. Aber kes Problem, wel: Ech be jo nie so de Fundi gsi, wo fendet, dass alli mönd chönne metrede bem Fuessball. Solang men öppis anders fendt, wome chli cha dröber fachsemple. Ech ha de glaub chli vode Schwalbe verzellt ond vode Ufwend ede Voralpe, ond dasch jo au rächt enteressant.

So huere fantasiivoll esch dä Wetz jetz eh ned gsi. Wel das esch jo ned sone riisige Zuefall, dass zwöi Lüüt Tomas Möller häissid, ech mäine: Dasch öppe de hüüfigschti Vorname kombiniert metem hüüfigschte Nochnamen em tütschschprochige Ruum. Dasch wie Luca Mäier oder so. Chasch der jo öppe vorschtelle, wie vell Tomas Möllers, dases öppe get. Wahrschiinlech füfschtellig. Dasch ke Konscht, Tomas Möller z häisse. Aso ech fende die Sach met de drüü Schantals düütlech krasser.

3. Provenz

Am Tag nach dem Konzärt benech de zom Jule usegfahre, voll ed Provenz. Aso be üs esch jo scho au Provenz gsi, aber Provenzhauptschtadt, emmerhen, do semmer scho chli schtolz druf gsi. De Jule aber: So rechtig Provenz, so rechtig hert Provenz. Fasch scho eden Alpe, ech mäine: Be üs esch jo meh so s Vorgeberge vode Voralpe. Nome, dass das för dech chli chasch iiordne.

Jetz mos ech jo zersch no säge: De Jule esch schwul gsi. Ned, dass mer das öppis usgmacht hätt oder so, öberhaupt ned, kenne ganz vell vo dene, de Brazzo esch zom Biischpel au mol schwul gsi ede Kanti ond ech be do total riläxt. Ond de Jule ond ech: Ganz alti Kollege. Wonech dä kenneglehrt ha, heter das nonig emol gwösst, das metem Schwulsii, so lang esch das här. Mos me gliich äifach gsäit ha. Ond ech wär jo au ned id Provenz usegfahre, wenn ech es Problem gha hätt met dem.

Ech be emmer gärn zom Jule use, has vor allem landschaftlech huere schön gfonden ede Provenz, dä het sone WG emenen alte Puurehuus gha met grossem Garte. Met Omschwong, het de Jule emmer gsäit: Omschwong, das Wort heter super gfonde, ond ech mos scho säge: Das esch ned völlig falsch gsi. Die hend rächt Hanf aapflanzt of dem Omschwong ond glaub au vo dem gläbt, wobii: De äinti vo sine Metbewohner het glaub no so chli temporäri Sache gmacht. Aber em Mettelponkt esch scho s Diile gschtande.

Hanech äigentlech au kes Problem demet. Hesch e Dschob, hesch e Dschob. Es paar send halt chli riskanter as anderi. As Fuessballer hesch emmer so Bänderproblem ond as Diiler halt meh met de Polizäi. Ech ede Hiumen Rissorsses weder anderi. Das mos am Schloss emmer no jede sälber entschäide, met welne Problem är sini Mieti wot zahle.

Aber ebe: Omschwong. E dem semmer amigs omeghanget, amene Gartetesch onder ere Buechen ond debii: Äi Tüte nach de andere. Aber ned so schmali schöni Schtadt-Tschoints, näi. So Sochti-Denger, meh so Chnöppel, ond wennd mol es Zögli gno hesch usnahmswiis, eschs gsi, wi wennd äini id Frässen öbercho hättsch vomenen usgwachsenen Orangutan.

Aber hei: Abwächslig. E Gartetesch ede Bärge met füf Schwulen ond mer. Wel am Jule sini Metbewohner send jo alli au meh oder weniger schwul gsi, das hani no vergässe z säge. Ergendwie fendid die das glaub guet, das Landläbe.