5,49 €
Mehr erfahren.
- Herausgeber: Books on Demand
- Kategorie: Poesie und Drama
- Sprache: Deutsch
- Veröffentlichungsjahr: 2023
Die Palz, die war´s zu alle Zeite wert, dass mer se besonnerschd ehrt! An Läwensluschd und Schäänhät reich, gebt´s uffem Globus kää Vegleich! Wer die vier Zeile läse kann, hat vun dem Buch de Sinn verstann! Mer soll net nur die Heimat liewe, es schad a nix, die Sprooch se iewe!
Das E-Book können Sie in Legimi-Apps oder einer beliebigen App lesen, die das folgende Format unterstützen:
Ähnliche
Inhaltsverzeichnis
Keeder
Die Geschischd vun de Palz
Die Menschhäd
Die Juchend
De Parre
De Fall
Die Heimat
Die nei Welt
Queerdenker
Annerschd
Meer zwä
De Hoogelmann
Ä Läwe
Keeder
„Oba, wenn du jetzt net ball was eschd, bischd du uff ämol noch de neggschd!“
Die Läwensluschd vum Ludwisch, die war fort, sei treuer Keeder war gestorb.
Dehäm war das kem äänerlää: „So enner krieh ich kenner mä!
Er hott die ganz Zeit Haus un Hof beschitzt, de Fremde Mut hott nix genitzt.
Un er war so e treui Seel, er fehlt mer, do draus mach ich kä Hehl.
Ich bin zu alt, ich hann´s verstann, ich will a gar kä Hund mä hann!“
Sei Erna war no fuffzisch Johr, gestorb an Krebs un is schun vor.
De Hund wars, wo die ganze Zeit, hott Kraft un Sinn ihm geb bis heit.
De ganz Bagaasch war schließlich klar: De Lui is nimmie, wie er war!
De Vadder mänt: „Der will net mäh, dann losse mer ne äwe geh!
Sei Määnung gebbt noch ebbes her! Geistisch kriet der noch die Kehr!“
Es Kaddche hott fer sich erkannt: Sie nemmt die Sache in die Hand!
Dass se im Lui sei Liebling is, hott´s jingschde Enkelsche gewisst!
Die Leesung war fer sie net schwer: E neier Keeder, der muss her!
Sie hott am Alt erumgeschafft, doch der hat sich net uffgerafft.
„Kaddche, ich dank der fer dei Mieh, e Keeder krie ich kenner mie!“
Es half kä Bitte un kä Zucke: „Ich muss allä no Hundcher gugge!“
Gesaat, gemacht! Zwää Orte weiter, gab´s e frischer Wurf, e ganz gescheider.
Mem Fahrrad isse hiegefahr, hott a de Eltre nix gesaa.
„Gun dach, Herr Lang, kannschd Du mir die neie Keederscher vielleicht mool zeie?
Weil du´s bischd Kaddche, awwer fix, bin uffem Sprung, un gugge koscht jo nix!
Die Keederscher, die warn grad satt, un ware dementsprechend platt.
Kreiz un quer han se iwwernanner gelää, zehle konnt die Kenner mäh.
„Ach Gott, wie viele sinn das dann?“ „Elf Weibcher un ä junger Mann!“
„Dange, Herr Lang, awwer vun denne Päns gefallt mir un im Lui net äns!
Mit denne is glaab net viel los, wies aussieht, dun die penne bloß!“
De Lang is grad mem Audo fortgefahr, do werd es Kaddche was gewahr:
Sie heert was wiffe un was waffe, do macht sich was im Stroh zu schaffe!
Jetzt kommt was Kläänes uff sie zu, sie merkt es glei, es is de Bu!
Es Schwänzje senkrecht uffgestellt, vor Frääd gewedelt un gebellt!
Sie hat sich runner zum gebeicht, do hat er ihr die Poot gereicht!
„Ach, mei Herz, bischd du so goldisch, ganz genau so änner wollt ich!“
Ihr Entschluss, der stand jetzt fescht: „Iwwerzeiche muss ich noch de Reschd!“
Mem Preis, do war mer sich schnell äänich, die Eltre ware do net kläänlich.
„Hogg ne in die Stubb eninn, es soll e Iwwerraschung sinn!“
Es is komm, wie´s komme muss: De Oba kriet ins Herz e Schuss!
Der Klää is annem hochgehupst, un hat ne mit de Noos gestupst!
Un eh de Lui de Schuss geheert, do wars schun um ne bassiert!
Der Oba, der war voller Frääd, die Lääwensluschd, die war nie weg!
„Was Bessres hätt mer kenne net bassiere: Komm, Keeder, mer gehn jetzt spaziere!
Do drauß mach ich a kä Hehl: E neier Keeder is e neui Seel!“
Die Geschischd vun de Palz
Kapitel äns
In de Eiszeit war die Palz, die alt, voll vun Schnee un bidderkalt!
Die Höhlepälzer hoddes schwer, mit Höhleleeb un Höhlebär.
Sie ware stännisch uff de Hut, dass se Känner fresse duut!
Un hosche mol net uffgebasst, hott dich sofort de Leeb gefasst!
Die erschde Pälzer sinn do schunn uff die Idee mem Feier kumm!
Es macht warm un naachts aa hell, wie mers omacht, lernt mer schnell.
Jetzt konndsche gä de Leeb dich wehre, un ne sogar gebroot vezehre!
Brennts Feier in de Höhl so schää, vermehrt mer sich un werd schnell mää!
Die Höhl war mit de Zeit zu eng, die Junge hann dann kriet die Fäng!
Ganz egal, wie die aa fluche, sie misse sich was Neies suche!
Sie hodde sich dann erschd beschwert, un´s dann wo annerschder proweert.
Die Höhle ware all besetzt: „Ei, was mache mer dann jetzt?
Meer brauche ebbes fer se hause, fer drin se schloofe un se mause!“
Do hann se sich e Höhl gemach, mit offedriwwer emme Dach.
Un middedrin, mer muss se loowe, e Abzuch fer de Raach vum Owe!
Uff Jachd ginge se all Gebott, die Raubdier warn ball ausgerott.
„Was mache mer jetzt mit de Waffe? Mer friemeln um se, fer se schaffe!
