Reisebericht USA -Kanada E-Book

Paul Infanger

• Herausgeber: Books on Demand
• Kategorie: Lebensstil
• Sprache: Deutsch

Seitenzahl: 39

Veröffentlichungsjahr: 2019

Beschreibung

Illustrierter Reisebericht in Versform, zum Teil in Schweizer Dialekt über eine halbjährige Reise (2018) mit dem eigenen Camper durch den Osten der USA, über Kanada nach Alaska und zurück über Westkanada und mittleren Westen der USA.

Leseprobe

Paul Infanger

wurde 1941 in Engelberg OW (Schweiz) geboren,

studierte Veterinärmedizin in Bern,

führte von 1972 bis 1995 eine tierärztliche Praxis

und war von 1995 bis 2006 als Kantonstierarzt des Kantons Luzern tätig.

Er ist seit 2006 in Pension.

Dank

Ich danke meiner Partnerin Erika für ihre Frühpension ... so dass diese Reise möglich wurde,

den Sängerfreunden vom Männerchor Ebikon, dass sie meine lange Abwesenheit zuliessen und akzeptierten

und last but not least allen, die unsere Reise mit Interesse mitverfolgten.

Inhalt

Weisskopfseeadler-Treffen bei Ninilchik (auf Kenai-Halbinsel in Südalaska)

Zur Pension

Abmäldig

Im Osten fing es an

Vo dr USA nach Kaanada

Z-Kaanada

Verpassti Matuurataagig

Manitooba

Zum Geburtstaag vom Presidänt

Säskätschwen und Albörta

Im Kreuzberg zu Dagmersellen

Im Yukon Territory

Über das Wetter im Yukon

Zentraal-Alaaska

Grussbotschaft zum Jubilaren-Fest

Alaska im Süden oder …

… Süüd-Alaaska

Vom Camperleben

Abschiid vo Alaaska

Z-Britisch Kolombie und z-Albörta

Vom Singe

Z-Montana und z-Wäioming

Süüd-Dakota

Schwüle Hitze

Im Mittlere Weschte und im Oschte vo dr USA

Zurück

Zur Pension

Fascht zwänzig Jaar bisch gsii im Amt -

Erika - als Kantonstierärzti insgesamt,

bisch gschtande lang in Eer und Würde,

jetz wotsch du wiiter gää die Bürde.

Ich wett en churze Rückblick mache,

über was alls du hesch muesse wache,

aber au es Bitzli vorwärts blicke,

was dier so chönnti Zuekunft schicke.

Ja mängi Süüch hesch duregschtande,

und d-Buure hend ned jedi Wiisig ganz verschtande.

Doch EP, Rinderwaan und BVD,

die tüend ne hütt ja chuum me wee.

Mit Blauzungechrankeimpfig hends gha Müe,

verworfe häigid drum die Chüe.

Bi Salmonelle, IBR und Bruzelloose,

hesch ghandlet rasch uf d-Diagnoose.

Au schtändig bisch gsii uf dr Huet,

wäg Biene mit der fuule oder suure Bruet.

Vogelgrippe, Klauesüüch und Schwiinepescht

hend di aafangs Jaarhundert ziimli gschtresst.

Mit Metzger, Schlachthööf hesch di umegschlage,

mit Kadawersammelschtelle müesse plage.

Hesch daa gluegt für Rächt und Ornig

und tänkt derbii: Mach niemmer zornig!

Doch Gsundheit isch für dich gsii wichtig,

drum hesch dier gseit: Mach ja alls richtig.

Dr Tierschutz - es schpeziells Kapittel,

und s-Thema oft als Ziitigstittel!

Tierhalter wend ned Iisicht haa,

wenn d-Wiisig sii ned chönnt verschtaa.

Maassnaame träffe, Tierverbot,

es schträngs Reschim im Fall vo Noot!

Damits guet gaat dem arme Gschöpf,

muess vill no gaa i gwüssne Chöpf.

Ja und de daa die biissig-böse Hünd

chönd gää zum Chlage viili Gründ.

Ja jede Biss und jedes Chratzä schier

het me müesse mälde doch bi dier.

Und isch s-Tier iigschtuuft de als Gfaar,

hesch Schritt iigleitet, das isch klaar.

Tierversüech – es Päch fürs Tier!

Sie chönnd unsäglich liide schier,

drumm müend ier sii au gnüegend schträng,

und jedi Uflaag füert zu Zwäng,

damits erträglich wird für sii,

am Schluss müend sii sich schicke drii.

Tier wärded importiert i-Masse,

i-jeder Grössi und vo jeder Rasse.

Oni Zügnis, Impfig chömds a Landesgränze,

verursached dett villfachi Turbulänzä.

Schlussändlich glandet sinds bi dier,

hesch müesse luege, dass das importierte Tier

iibürgered worde isch i üsem Land,

bevor es gaat i Bsitzers Hand.

Bi Veeusstellige -

wo d-Chüe uufgschtellt sind wie im Räige,

hesch Sachverschtand go müesse zäige.

Für d-Buure isch das gsii en Eer,

für d-Veezuchtverbänd no umsomeer.

Niem dänkt, s-chönnt sii doch süüche- oder

tierschutzrelewant,

und das grad drum, will zu vill Milch das Uuter schpannt.

Äi Klientel - isch gsii vo bsunderem Inträsse.

Mit denä bisch mit Freud du zäme gsässe.

Und das sind d-Jeger - dett bisch gsii gwoont,

dass duu wirsch mit Applaus beloont.

Vill Wüsse hesch vom Vater ghaa,

au äär hed gschtellt uf dr Jagd de Maa.

Und was me gar ned darf vergässe,

mit de Imker hesch di gärn la mässe.

Will sälber hesch en Grundkurs gmacht,

wäisch duu wies Bienli suecht e Tracht.

Ja daa bi dene winzig chliine Tierli

ischs diier halt gloffe wie am Schnüerli.

Ja und de d-Veehändler - e schpezielli Rasse,

chönd ned nur handle, chönd au jasse.

Hend schiins sälte öppis z-Möögge ghaa,

doch mit Handelsschtüür chönnds nüüt afaa.

Au mit dr ganze Landwirtschaft

und Tierärzt hesch guet zämegschafft.

Du hesch grad so vill Stallgruch ghaa,

wie unbedingt me sötti haa.

Und ooni dää und ooni sii

wär diini Uufgab müesam gsii.

Bim Bund hesch nid vill gha zum Lache,

will äär so vill Verordnige tuet mache,

die unnötig und au bürokratisch sind,

das isch dier gange ned in …Chopf.

Hesch quer dich gschtellt, auf in den Kampf,

doch schnäll au gmerkt, es isch en Chrampf.

Au d-Schurnis hend dich ghalte rächt uf Traab.

Si hend durchuus e sonderbari Gaab

zum Informiere, über Vorgefallnigs z-prichte,

aber süffig müend si sii die Gschichte.

S-heds gää, hesch gsäit, es git hütt nüüt,

wo chönnti inträssiere d-Lüüt.