5,99 €
Mehr erfahren.
- Herausgeber: BoD - Books on Demand
- Kategorie: Geisteswissenschaft
- Sprache: Deutsch
Mit dem Titel soll daran erinnert werden, dass sich die wichtigste deutsche Sage bei uns in der schönen Pfalz abgespielt hat. Die Handlung ist (etwas) gerafft und in westpfälzer Dialekt verfasst in der Hoffnung, Dialektfreunde jeden Alters zu erreichen. Viel Spaß beim Lesen!
Das E-Book können Sie in Legimi-Apps oder einer beliebigen App lesen, die das folgende Format unterstützen:
Seitenzahl: 63
Veröffentlichungsjahr: 2026
Ähnliche
Inhaltsverzeichnis
Die Nibelunge – e pälzer Sage
Casanova
Die Literatt
Gradselääds
Unser Heisje
Löwenherz in de Palz
Die Nibelunge – e pälzer Sage
Prolog
Vun Zitate kann in de Geschichte
Immer widder mer berichte
Berühmt is der seit alters her
Der oft genung zitiert wor wär
De Cäsar saat: Die Werfel sin gefall
Un hott de Brutus fer sei Freund gehall
Er kam, sah un hott gesiegt
Un dann es Messer in de Rigge kriet
Weit vor dem hott uns geb de Heraklit
E schlauer Spruch fers Läwe mit:
Die Erkenntnis, mennt der, wär net schwer
Dass nix so bestännich wie de Wandel wär
Ihr Leit, nemme das als Mahnung:
Der Mann war alt un er hott Ahnung!
406 sin die Burgunder bei Mainz iwwer de Rhein
De Keenisch saat: Das do Land is jetzt mein!
Er war sich domols noch net driwwer klar
Dass er grad in Rheinhesse war
Wie er dann Richtung Süde guggt
Hat er sich dann am Wein verschluckt
So e schänes Land hott der noch net gesieh
Un sich gesa: Dort muss ich hie!
Ihr kenne mich gäre zitiere:
Ich du in die Palz eich fiehre
Do bleiwe mir, weil uns gefallts
In Rheinhesse un de schäne Palz!
Mir baue Wein o, treiwe Handel
Bei uns gebt´s ganz bestimmt kä Wandel!
Das war gelo: Nadeerlich hott´s geb Krach
Die Rechnung ohne Weibsleit war gemach
Ihr Männer: Unnerschätze nie- das gelt bis heit-
Die Weiwer un ihr Stutebissigkeit!
Ich du eich jetzt dovun berichte
Wie Fraue e Königreich vernichte:
Die Männer mänens allegar nur gut
Un leie hinnerher in ihrem Blut
De Grund is, ihr werre´s siehn
Dass die Mäd ihr Wille krien
Mit Tapferkeit un Mut un Ehre
Kann sich do kä Mann gä wehre
Bei schäne Mäd bassiert das häufich
Do sin die Buwe all zwangsläufich
Un bei schäne Mäd mit starkem Wille
Duun sich dann die Männer kille
Do werd sich dann so lang entleibt
Bis hinnerher nix iwwer bleibt
Immerhie: Erspart bleibt denne, wo sich doot geschla
De Spruch vun de Fraa: Ich han der´s doch gesa!
De Ofang is uns jetzt gelunge
Jetzt geht´s los mit de Nibelunge
Erschder Dääl
Kapitel I
Worms war gewä - ohne Vergleich
Die Hauptstadt vum Burgunderreich
In däre schäne alde Stadt
Do han se schun e Dom gehatt
Die warn noch net lang konvertiert
Sin fleißich in die Kerch marschiert
Es alt Ute, im Keenich sei Mamme
Die halt de ganze Lade samme
Sie wart un wart schun lang vorm Dom
Un schellt: Das han ich jetzt devon!
Gunter, Gernot, Giselher
Komme ihr mol dabber her!
Wormser Dom
Han eier Schweschder ihr gesieh?
Die Bix, ich glab, ich werr nimmie!
Die is schun widder abgehau
Däre ihr Bobbes, der geheert verhau!
Mamme, sei doch net so iwwerzwerch
Die is zum bäde in die Kerch
Du wäscht doch, es Kriemhild is ganz fromm
Un sie hott ihr Zofe mitgemomm
Die zwä, die basse uff die uff
Dass Niemand kratzt am gude Ruf
Du Schof, guck mol im Rosegarte
Do siehsche die zwä Zofe warte
Es Kriemhild duut de Knecht verfiehre
Un die Mäd, die stehe Schmiere
Gugge bloß net so verdutzt
Ihr nemme se jo stets in Schutz
Hagen, komm mol mit, Genosse
Uff die kann ich mich net verlosse
An deiner Treu han ich kä Zweifel
Geh un bring mir denne Deiwel!
Un nemm dei Bruder Dankwart mit
Dass de Knecht sei Lohn glei kriet
Un wenn der ebbes dummes saat
Dann schneid em gleich sei Schwänzje ab!
Es Kriemhild hat Spaß mem Knecht
E Königstochter is stets keusch
Wenn mer sich do mol net täuscht!
E Gesicht wie vum e Engelche
Awwer innedrin e Bengelche
Korz: Das Gör war wunnerscheen
Awwer durch un durch verwehnt
Sie saat: Heirate du ich mol net
Weil mich das inschränke dät
Ich loss die Luscht mir net vermiese
Mei Läwe will ich voll genieße
Die gesellschaftliche Zwäng am Hof
Die sin mir allegar zu doof
Mei Brieder sin mir treu ergeb
Die mache mit mei ganze Knebb
Beim Hagen bin ich liewer still
Der macht bloß, was die Mamme will
Was der alles vun mir wäß!
Un er guggt immer so bees
Er hat zwar bloß nur noch ä Au
Doch domit sieht er mich genau
De Hagen un sei Bruder ertappen die Zwä vor Ort
Sie saan zum Knecht: Borsch, schaff dich fort!
Un die Prinzessin kommt jetzt mit uns mit
Weil die gleich vun de Mamme Zunder kriet!
Un heer uff, dich laufend zu beschwere
Du duscht die ganz Bagasch entehre!
Es Krimhild sich jetzt füge dut
Trotzdäm macht´s e beesie Schnut
Un bloß zwä Minudde speeder
Folgt de Ute ihr Gezeter
Was han ich do nur groß gezo
Stännich werd mer ogelo!
Laufend bät ich´s Paternoster
Es beschd wär, ich steck dich ins Kloster!
Mamme, reesch dich ab, ich wäß
Du kannscht mer jo nie lang sin bees
Du bischd e Mudder voller Güte
Stets haschd du mich gut behütet
Du muscht der kä Gedanke mache
Iwwer die Lieb kann ich nur lache
Die Liebe hat - frieher wie heit
Seit jeher bloß gefiehrt zu Leid
Ich werre niemols mich verknalle
Un wäß, dass mir sesamme halle
Mei Vadder Dankrat hat vorm Doot
Mir noch gebe guder Root:
Kind, du werrschd mol herrsche misse
Du´s Läwe bis dorthin genieße
E schlechtie Ehe is e Grab
Stoß bis dohie dei Hörner ab!
Es liebscht is mer do unser Koch Rumold:
Der saat immer: Dei Vadder hätt´s gewollt
Mamme, ich muss der was verzehle:
Seit korzem duut e Traum mich queele
Ich han e Falke großgezo, der is net se toppe
Do komme zwä Adler un duun ne verrobbe
Jed Nacht träm ich das un wäß dann net
Was das Ganze se bedeute hätt
Es Ute männt: Das kann ich dir saan:
De Falke steht fer e edler Mann
So Äner gereicht dir zur Ehre
Doch du drohscht ne zu verleere
Wenn denne net beschützt de liewe Gott
Dann leit am Schluss der vor dir un is doot
Siehsche Mamme, die Liebe hott genung
Leid de Mensche schun gebrung
Fer mich sin alle Männer Riewediewe
Die sin`s net wert, sich zu verliewe
Es Läwe, wie ich´s jetzt han, is schä
Ich bleib mei Läwe lang allä!
Es Ute männt nur: Alla hopp
Jeder Deckel find sei Topp
Die Zeit werd mei Geduld belohne
De Rescht mache dann die Hormone
Kapitel II
Weit weg vom uns bereits Bekannte
Leit am Rhein erunner Xante
De Siegmund in dem Land Keenisch war
Un es Sieglinde war sei Fraa
De Siegfried, denne zwä ihr Bu
Geheert nadeerlich a dezu
E starker, kampfgewandter junger Mann
Sei Antlitz schlaat die Fraue in sei Bann
Wenn der bloß korz sei Bizeps zeicht
Werrn alle Mäd im Knie ganz weich
Er braucht kä Minnesang zu wälze
Die Weiwer duun a so schun schmelze
Gemäß allseits geltendem Recht
Feiern die dort e großes Fescht
Viel Kämpfe werrn dort uffgefehrt
Weil heit de Siegfried Ritter werd
Der Bu hat heit sei Schwertleih kriet
Un hott dofor sich hie gekniet
De Vadder ruft: Erhebe dich!
Was machscht du dann fer e Gesicht?
Ach, Babbe, die Grafe han gemännt
Dass ich jetzt nimmie schlenze kennt
Die däten gäre mich als Herrscher sieh
Doch fer mich wär das viel zu frieh
Aus Herrschaft mach ich mer net viel
Wo ich doch so gäre Ritter spiel
Ich trät gäre hinner eich serick
Iwwerloss es Land eierm Geschick
Fer mich, das kann ich eich saan
Han ich e ganz annerer Plan:
De Rhein enuff, net weit vun do
Dorthie fühl ich mich hiegezo
Vun dorther Kunde zu mir dringt
Die mei Blut in Wallung bringt
Dort leit es groß Burgunderreich
Do muss ich hie, das saan ich eich!
